Shillong, Iaiong 22: Ka Meghalaya Energy Corporation Limited (MeECL) ka la pynjlan ïa ka one time settlement (OTS) scheme, 2025 haduh ba kut jong u bnai Ïaïong ban lah siew ïa ka pisa kaba dang sah halor ki bill elektrik.
Haba ïathuh ïa kane ha ka sngi baar u Myntri ka tnat Bording u AT Mondal u la ong, “Ha ka jingshisha ka OTS Scheme, 2025 kan treikam haduh ka 31 tarik u bnai Lber. Hynrei hadien ba la ïohi ba ka don ka jingjubab, ngi la pynjlan ïa ka haduh ba kut jong une u bnai.”
Ïa ka OTS scheme la plie da u Myntri Rangbah ka jylla u Conrad K Sangma na ka bynta kiba pyndonkam bording jong ka MeECL ha ka 4 tarik u Lber.
“Lah jan 45000 ngut kiba pyndonkam bording kin ïoh jingmyntoi bad palat T. 26 klur ki surcharges and penalties yn sa aiti bad pyllait. Kiba pyndonkam bording kin hap ban siew ïa ka principal amount ne ka dor bai trai kaba 40 percent bad ka 60 percent kaba sah ba kin siew khyndiat khyndiat ha ki san sien kaba khlem sut,” ïathuh u Myntri Rangbah dangshen.
Ka OTS Scheme 2025 ka treikam na ka bynta ka “Domestic Low Tension (DLT)” bad ka “Kutir Jyoti/ BPL” consumer kiba la shah pynbna ka load kaba 5 (Five) KW bad hapoh na ka bynta ka jingshah ot ïa ka jingsam bording na ka daw jong ka jingbym siew na ka bynta ka jingdonkam ban ïoh siew ïa ka pisa kaba dei ban siew haba ïadei bad ki bill elektrik.
Tang kito kiba pyndonkam bording kiba la shah ot ne ki disconnected consumers ki lah ban apply na ka bynta ka OTS Scheme 2025 bad ki lah ban ïoh ki jingmyntoi.
Ka bill kaba dangsah jong baroh kiba pyndonkam ïa ka bording ka long T. 119 klur.
