Shillong, Kyllalyngkot 30: Ka la long sa kawei pat ka sngi kaba kthang na bynta ka Ryntih FC namar ba ka la mad biang ïa ka jingshah rem haduh 8-0 kol ha ka Rangdajied United FC ha ka jingïalehkai ka lympung OC Blue Shillong Premier League 2024 ha madan First Ground-SSA Stadium, Polo, ha ka sngi Palei.
U Owanijuh Pajuh u la lah ïoh ïa ka hat-trik tang ha ka kylla step da kaba pynkhih lai tylli ki kol ba la wan ha ka 12, 29 bad 36 minit. Kiwei pat kiba la ïoh pynkhihjar ki long u Dibormi Kassar (30’minit), u Wansiewdor Nengnong (47’, 54’minit), u Aenam Jyrwa (53’minit) bad u Benny Khriam (70’minit). Nalor ka namjop ka Rangdajied ka la bteng ruh ban pynnneh ïa ka rukom jingïalehkai ba skhem jong ka shadien, ha kaba ka la lah ban pynjlan haduh 10 tylli ki jingïalehkai khlem da shah thep kol ha ki liang pyrshah.
Kane ka namjop ka la rah ïa ka RUFC ha ka kyrdan ba ar ha ka miej, da kaba kamai 26 poiñ ban tam ïa ka Shillong Lajong (25 poiñ), watla katta ruh ka Lajong ka dang don sa ar tylli ki jingialehkai ha kti. Katba ka Ryntih ka dang ïaineh shatrai duh jong ka miej da tang 3 poiñ bad kane ka dei ka namrem kaba 10 sien lynter jong ka mynta ka samoi.
U Owanijuh u la thep volley ïa ka kol ba nyngkong hadien ka bol pashat kaba la wan na u Freddy B Jyrwa bad nangta u la pynbud ïa ka kol kaba ar kaba la ïarap pynbuh da u Denelson Pyngrope. Ka hat-trick jong u ka la wan jia ryngkhat, da ka jingpyrshang kaba la khyrwit tyngeh beit beit sha jaka ïeng u nongap kol jong ka Ryntih. Ka bol ka la sum shapoh shwa ban poi sha u Derick Khongsit bad ka la ïaid lyngba ki kjat jong u. U la shim ïa ka bol hynrei ka rai na u assistant referee ka long ba ka bol ka la ïaid lait ïa u laiñ kol.
Khyndiat minit shuwa kane, u Owanijuh u la long u nongïarap da kaba rah ïa ka bol sha liang kadiang shuwa ban pashat sha u Dibormi ban thep ïa ka kol.
Ka Rangdajied ka la thep sa lai kol hapoh ka khyllipmat jong ki 10 minit jong ka kylla miet, ha kaba u Wansiewdor Nengnong, uba la wan kum u nongbujli ha ka kylla kaba ar, u la ïoh ban pynkhih ïa ar tylli ki kol. Hapdeng kine ki ar kol jong u Wansiewdor, u Aenam Jyrwa u la ïoh ban kyntiew ïalade ha ka thup thep kol da ka jingpyrshang kaba khlaiñ bha kaba ym shym la lah ïada da u Derick watla u la ïoh ban ktah khyndiat ïa ka bol da ka kti.
Ka jingïalehkai ka la sdang ban pjah hadien kane hynrei u Benny, uwei pat u nongïalehkai ba mih bujli, u la thep pynkut ïa ka kol bad khatduh ha ka minit ba 70.
Ka Ryntih kam shym la ïoh bun ki kabu hynrei u Banteilang Lyngdoh u la lait salit ban ïoh thep na ka free-kick kaba u la shut ha ka kylla miet.
Mynta ka sngi, ka Nangkiew Irat SC kan aireng pyrshah ïa ka Sawmer SC ha ka por 2 shiteng mynsngi. Haba phaidien, ka Sawmer ka la sdang ïa ka samoi da kaba jop 3-2 kol ïa ka Nangkiew Irat ha ka sngi ba nyngkong jong ka OC Blue SPL 2024 ha u Risaw, hynrei ki la mad ïa ki jingïaid lynti kaba sniew shakhmat, ha kaba san tylli ki jingïalehkai ba khatduh jong ki baroh ki la kut ha ka jingshah rem. Katba ka Nangkiew Irat pat ka la ïakhaid lai sien lynter bad ka kwah eh ban jop.
