Pynjari korphiw ka DC ba ïa kulmar naba ïaid paidbah ban leit thung nar kol ha Mawkynrew

Shillong, Kyllalyngkot 20 : Mynta ka sngi ka Deputy Commissioner (DC) jongka East Khasi Hills I Kong Rossetta M Kurbah i la hap ban pynjari noh da ka korphiw ha ka shnong Mawkynrew namar ba la mih ki jingkulmar hapdeng ki paidbah bad ki bor pulit hadien ba ki trai shnong ki la ïamih bad ïaid paidbah ban leit thung nar kol ha ka madan phutbol kaba hajan ka jaka ba la tei ïa ka skul Ramakrishna Mission. Ha kane ka jingkulmar kumba hynriew ngut ki briew ki la mynsaw kiba kynthup ïa saw ngut ki pulit kynthei bad arngut ki riew paidbah.
Ha ka jingshisha kane ka jingïaknieh ïa kane ka madan ka la jia la katto katne por hadien ba la kynnoh ba ka Dorbar Shnong ka la ai sob sob ïa ka jaka sha ka Ramakrishna Mission ban tei ïa katei ka ïing skul. Nalor kata kane ka kam mynta ka dang don ruh ha ka jingbishar jongka ïing Bishar. Hynrei ym tip na kaei ka daw ba la rai ban ïaïaid paidbah bad thmu ban leit thung nar kol ha katei ka madan namar ka ïing Bishar ruh kam pat ai kano kano ka rai halor kane ka kam ïaknieh ïa katei ka jaka.
Na ka liang u MLA ka Mawkynrew Constituency u bah Banteidor Lyngdoh haba ïakren bad u Mawphor u la ïathuh, hadien ba la mih ki jingïakulmar bad hap ban pynjari da ka korphiw na ka liang jongu u la ïakren bad ka DC bad kumjuh ruh bad ki bor synshar shnong ban peit ba ka shongsuk shongsaiñ kan wan phai biang ha katei ka shnong bad ban ym don kino kino ki jingjia ba sngewsih. Na ka liang ka DC bad ki bor synshar shnong ki la rai ban ïatrei lang ban wanrah biang ïa ka jingshong suk shongsaiñ. U la ong “ Ngam don ei ei ban ong halor ka jingïaknieh jaka namar kane ka dei ka kam jongka shnong bad ki paidnong shong shnong hynrei kaei kaba nga kwah ka long ban wanrah ïa ka shongsuk shongsaiñ ban ym jia kino kino ki jingjia ba sngewsih nalor kata ban ïa pynbeit ruh da ka jingïasngewthuh jingmut ïa kane ka kam kaba la ïai sahteng la katto katne por”.
Ha ka hukum ba la pynmih da ka DC I kong Rossetta M Kurbah, i la ong “ Da kaba pyntreikam ïa ka bor ba la pynkup ha nga kat kum ka kyndon aiñ 163 BNSS nga la pynjarai ïa ka korphiw ha ka shnong Mawkynrew naduh mynta ka sngi tad haduh ban da pynbna da kumwei pat.ïa kane ka hukum nga la pynmih hadien ba la ïoh jingtip ba ka la don ka jingthut ka shongsuk shongsaiñ ha ka shnong Mawkynrew kaba la don ruh kiba la pynjot pynpra ïa ki tiar bad ki tar ha ka skul Ramakrishna Mission, Mawkynrew. Kine ki kynrum kynram ki lah ban dang bteng kiba lah ruh ban dang ktah ïa ka shongsuk shongsaiñ kumta ban khanglad ïa kine nga la pynjari da ka korphiw” pynkut ka DC.
Ha kane ka jingïakulmar mynta ka sngi ki pulit kim banse ban pyndonkam da ki dieng lathi bad ban siat ruh da ki lyer pynsat khmat ban pynpra ïa ki paidbah.
Kane ka jingkulmar ka la jia hadien ba ki paidbah na ka shnong Mawlein bad Mawkynrew ki la ïamih ban leit tur sha ka madan ban thung ïa ki nar kol namar la ong ba ha kaba nyngkong ki bor synshar shnong ki la dep ai ïa ka madan sha ka Mawkynrew Sport Club hynrei hadien pat la ïoh jingtip ba ki la ai sob sop ïa ka jaka sha ki nongpynïaid ka Ramakrishna Mission khlem ka jingtip jong ka shnong.
Dei ha ka por ba ki paidbah ki la mut ban tur jubor sha katei ka jaka ba tei ïa ka ïing skul ba la mih ka jingïapyni bor bad ki pulit ha ka jingïadon lang ki majistor. Ha ka jingïapyni bor ki pulit kim banse ban pyndonkam da ki dieng lathi bad siat da ki lyer pynsat khmat khnang ba ki paidbah ki ïa pra na katei ka jaka.
Na ka liang u SP ka East Khasi Hills u bah Vivek Syiem ula ïathuh ba kitei kiba mynsaw malu mala ki dei saw ngut ki pulit kynthei bad arngut ki riew paidbah. Khnang ban pynkhlaiñ ïa ka jingpahara u SP u la phah shuh shuh sa shi pyrton ki bor pulit sha katei ka shnong ba kin ap pahara ha katei ka jaka ba tei ïa katei ka ïing skul.