Tura, Nailar 29 : U Deputy Commissioner (DC) jongka West Garo Hills u la pynjari ïa ka kyndon aiñ 144 CrPC hadien ba u la ïoh jingtip ba ki Seng Bhalang bapher bapher ki la khot ïa ka pakhang ophis MeECL bad kumjuh ruh ia ka pakhang surok miet namar ba ka sorkar kam pyntreikam ïa ki jingdawa jongki ban pynbiang bording sha ri lum Garo.
Ka jingpynjari ïa kane ka kyndon ka long ban khanglad ïa ki seng ba kin ym ïoh lad ban pynthut ïa ka jingleit ophis, ïa ka leit ka wan ki paidbah ha ka por miet bad khamtam ban ym don kino kino ki jingjia ba sngewsih. La khang ruh ban ïalum briew palat ïaka saw ha kajuh ka jaka ne ban rah ïa kino kino ki tiar pynmynsaw.
Ki seng bhalang bapher bapher ha ri lum Garo ki la pakhang ïa ki ophis treikam ka MeECL ha baroh kawei ka ri lum Garo naduh mynta ka sngi 29 tarik Nailar haduh 3 tarik Nailur bad ha ka por miet pat da ka pakhang surok naduh 9 baje haduh 5 baje mynstep bad kane kan ïai bteng 6 sngi lynter.
Ka jingïakhih ki Sengbhalang ka long halor ka jingdawa ban thungkam ki postba dang lait ha Rilum Garo khnang ban lah ban pynbiang ïa ka bording namar ka la don ka jingud na ki paidbah ia ka jingthut palat ka bording. Nangta ban dawa ban nym pynkynriah kam than tang ïa ki Garo sha kiwei pat ki jaka.
