Pynïeng ka KSU da ka khyrdop talasi mynder ha Athiabari khappud Assam
![](https://mawphor.com/wp-content/uploads/2022/04/KSU-1.jpg)
Nongstoiñ, Naitung 12: Shi taiew hadien ba ka seng KSU ka la buh ïa ka ILP check gate lane ka khyrdop khynra mynder ha Ri Bhoi District ha Mawleiñ, mynta ka sngi pat ka KSU West Khasi Hills ka la buh sa kawei pat ka ILP check gate ha Athiabari, na ka bynta ban khang lad ïa ki mynder kiba wan na Assam lyngba ka West Khasi Hills.
Ha kane ka jingleit buh check gate jong ka seng KSU, la sakhi ruh ïa ka jingdonlang ki pulit kiba la pyrshang ban khang ïa katei ka jingleh jong ka seng. Hynrei na ka liang ki dkhot ka seng ki la ieng beit ha katei ka jaka, na ka bynta talasi ïa ki kali bad ïa ki briew ba wan na shabar ka jylla.
Lah ban kdew hangne ba ka KSU ha ka taiew ba la dep, ka la pynjur ïa ka jingkhynra ïa ki mynder khamtam eh ïa ki nongbylla bar jylla, namar ba ka sorkar ka suki palat ban pyntreikam ïa ka ILP bad kumjuh ruh kam shym la pyntreikam satia haduh mynta ïa ka aiñ MRSSA.
Ha kane ka shitaiew na ka liang jong ka seng ka la pynlong ruh ïa ka jingkhynra ha kylleng kylleng ki jaka jong ka nongbah Shillong. Halor kane ka jingleh jong ka seng, lah ban kynmaw ba u myntri rangbah ka jylla u la ong ba ki seng, kim don hok satia ban khynra namar ka dei ka bor jong ka aiñ bad Labour Department.
Ha kajuh ka por ruh u Myntri Rangbah ka jylla u Conrad K. Sangma u la ong ba ki nongbylla bar jylla kiba wan sha ka Meghalaya, kim donkam satia ïa ka Work Permit hynrei ka KSU ka la pynkynmaw ba ki don ki aiñ ba ki nongbylla ki dei ban rejistar ne ki dei ban ïoh ïa ki kot ki sla kiba biang, la ka long na ki Autonomous District Council lane na ka Labour Department.