Pynïasoh 3 ngut ki riew pawkhmat kynthup 2 ngut ki CEM barim ka KHADC sha ka UDP

Nongpoh, Nailar 25: Ka party UDP kala nang khlaiñ bad ioh bor ha Ri-Bhoi District hadien ba 3 ngut ki nongïalam ba pawkhmat kiba la ih bha haka politik ba kynthup ruh 2 ngut ki CEM barim ka KHADC mynta ka sngi kila leit ban pynïasoh ïalade bad ka party UDP ha shuwa ka elekshon 2023 naka bynta ban pynkhlaiñ ïaka party bad buhthong ruh ban pynjop ïaki kyrtong ha baroh 5 tylli ki constituency ha Ri-Bhoi District.
Kitei ki 3 ngut ki riew pawkhmat ka Ri-Bhoi kiba la pynïasoh ïalade bad ka party UDP ki kynthup ïa u Bah RR Makdoh, u Bah CB Syiem kiba dei ki CEM barim ka KHADC kiba dei ruh ki nongkyrshan ba radbah jong ka party NPP kiba la leit pynïasoh ïalade bad ka party NPP haki snem bala leit noh ryngkat bad u Dr. DD Lapang, bad u Bah RB Shadap ba dei u nongkyrshan ba radbah jong u Bah Jason Mawlong MLA ka Umsning haka elekshon bala dep, u ba bat ruh kum u President ka Ri-Bhoi Dorbar haka jing don lang ki nongkyrshan jong ki.
Ïa kitei ki 3 ngut ki riew rangbah bala iaw bha haka politik ha Ri-Bhoi la pdiang burom ïaki da u Bah Metbah Lyngdoh President ba rangbah ka UDP haka jylla haka jingdonlang u Bah Donbok Khymdeit President ka UDP ha Ri-Bhoi, u Bah Pius Marweiñ MLA ka Ranikor, u Bah Balajied Ranee MDC ka Nongpoh, Bah HDR Lyngdoh myntri barim ka sorkar jylla, bad kiwei kiwei ki riew rangbah bad nongïalam ka party haka jingïalang kaba la long haka shnong Iewmawlong.
Haba kren mynta ka sngi kitei ki 3 ngut ki riew rangbah naduh u Bah RR Makdoh, CB Syiem bad u Bah RB Shadap kila pynpaw ba ka daw bala pynlong ïaki ban iehnoh ïaka party kaba ki kyrshan baroh shi katta ka dei namar ba kim hun bad mon halor ka rukom treikam jong ka party bad ka jingiohi jong ki halor ka lawei ba ka UDP ka don ka jingkyrmen haka jylla kaba dei ka party riewlum ban ai ka jingshakri ïa u duk u suk bad ki kup shilliang sem shillliang.
Kila pynaw ruh ba kim kynthoh ïano ïano halor ka jingmih ka jong kin aka party kaba ki don, hynrei ka jingleit jong ki ban pynïasoh bad ka UDP ka long ban trei bad ban ai ka jingshakri sha ki paidbah kaba bha tam, kumba ka party UDP ka don ka thong bad ka jingshaniah ban lam ïaka sorkar ha kane ka elekshon ban wan ryngkat ka jingkyrmen bad kan sei ruh ban pynjop ïaki kyrtong ha baroh 5 tylli ki constituency ha Ri-Bhoi.
Naka liang u Bah Metbah Lyngdoh kum u President u la pynpaw ka jingsngewkmen kaba khraw ban pdiang sngewbha ïa kitei 3 ngut ki riew rangbah bala iaw bha haka politik haka them Ri-Bhoi bad ki nongkyrshan jong ki kiba la wan ban pynïasoh ïalade bad ka party UDP naka bynta ban dang shakri ban wanrah ki jingkylla haka district bad ka jylla baroh kawei.
“Kam long kaba suk ban jam na kawei ka party sha kawei pat, ka jingwan pynïasoh jong phi ka don ka daw tynrai bad ka dei namar ba phi iohi jngai ïaka jinglong jingman haka jylla bad baka party UDP ka dei ka party riew lum kaba don jingkyrmen ha kane elekshon ban wan ba ki paidbah ki ai ka jingshaniah bad ka jingkyrshan” la ong u Bah Metbah da kaba bynrap ruh ba ka jingwan pynïasoh kitei ki 3 ngut ki riew rangbah kan dang pynkhlaiñ bad pynioh bor shuh shuh ïaka party ha Ri-Bhoi District.
U la kop ruh b aka party UDP ka don ka thong ban synshar hadien ka elekshon 2023 kumba ka don ruh ki kyrtong bad ki nongïalam kiba tbit ki ban ïalam ïaka party naka bynta ka jingkylla haka jylla baroh kawei, u la bynrap.