Pynïar shnat ka KSU ban shakri ïa ki paidbah ka them Ri Bhoi
![](https://mawphor.com/wp-content/uploads/2022/04/KSU-1.jpg)
Nongpoh, Naitung, 09: Ki Nongïalam ka Khasi Student Union kiba kynthup ïa u bah James Hitler Mawphniang Secretary Legal Affairs KSU CEC bad u Bah Ferdinald Kharkamni President KSU NHKD ha ryngkat bad ki dkhot jong ka, ki la leit ban pynskhem ïaki nongkitkam kiba thymmai jong ki artylli ki unit kiba hap hapoh ka Nongpoh Circle.
Kitei ki artylli ki unit kiba kynthup ïaka Umjarasi Unit bad ka Sohlait thymmai Unit la ïoh ban pynskhem noh ïaki nongkitkam kiba thymmai haka 8 tarik u Naitung haka jingïalang ka ba la long ha iingdorbar Nongpoh, da u Bah James Hitler Mawphniang kum u nongïalam baha khmat jong ka KSU CEC hakaba hakatei ka sngi la ïoh ruh ïaka jingbam smai naki dkhot Jong kitei ki artylli ki unit.
Ki nongïalam ka KSU haba ai jingkren ha kane ka sngi ki la ai ka jingkhublei ïa ki dkhot ba thymmai Jong kine ki artylli ki unit. Ki la Ong ruh ba kum ki nongïalam jong ka seng KSU ki dei ban long kiba shemphang haka kam bad kiba don ïaka jingbah khlieh naka bynta ka khia ka shon jong ka jaitbynriew baroh kawei.
Shuh shuh ki la pynkynmaw ruh ba ka seng KSU ka la ju don bynta ha kiba bun ki jingïakhih la kadei ha ka pule ka dangle, ka jingwat kam wat jam ki khun samla bad kumjuh ruh ha kaban ïeng pyrshah bad ka sorkar ha kiba bun ki liang ha ka ba ki la mih ruh shibun ki jingkynthoh pyrshah ïaka seng hynrei kum ki nongïalam kiba shemphang ngi khlem kynran dien ban tur shaphrang wat iaki jingeh bad ki jingshah pyntyrha ka bynta ka jingbha jong ka ri bad ka jait bynriew.
Kine ki nongïalam ki la kyntu ruh ïaki dkhot ba thymmai jong kine ki artylli ki unit ba kim dei ban kynran dien haba mih kino kino ki jingshah kynthoh lane shah kren pyrshah, hynrei ki dei ban ïeng skhem ha ka nongrim kum ki dkhot ba pura ka seng ha ka ba kila kyntu ruh ba ki dei ban long ki ba don akor burom khamtam haka ïaid ka ïeng bad barabor ki dei ban don ka jingïatrei lang para dkhot khnang ba kan nym wan rah ïaka jingïa sngewthuh bakla bad ruh ban don ka jingiatreilang bad ki bor shnong naka bynta ka bha ka miat imlang ka sahlang.