Shillong, Naiwieng 02: Hadien ar tylli ki jingïalang ba dang shen jong ki seng saiñ-hima kata ka Hill State People’s Democratic Party (HSPDP) bad National People’s Party (NPP) ha ka lynti ïaid sha ka elekshon jied nongmihkhmat sha ka ïing Dorbar Thawaiñ ka Jylla Meghalaya na Mawkynrew Constituency, ki samla kiba kyrshan ïa ka People’s Democratic Front (PDF) ha katei ka Constituency ha ka 02 tarik u Naiwieng, 2022 da ki hajar ngut ki la mih sha khmat ban pyni ïa ka bor jong ki da kaba thaw ïa ka kynhun treikam kaba la tip kum ka People’s Democratic Youth Front (PDYF) Mawkynrew Constituency ha ka jingïalang kaba la long ha Thangsning.
La wan ban pynskhem ïa ki nongkitkam ka PDYF Mawkynrew Constituency da u Bah Banteidor Lyngdoh, MLA ka PDF na katei ka Constituency uba dei ruh u Myntri ba dei peit ïa ka tnad kam rep, Sports ka Sorkar Jylla bad kum u Working President ka PDF CEC ha ka jingïasakhi lang ki nongïalam ba ha khmat ka PDF ba kynthup ïa u Bah Emlang Lytan, Bah Elezar Chyne, Bah Egenstar Kurkalang nalor kiwei pat ba kynthup ïa ki nongkitkam ka PDF Zonal Committee Mawkynrew Constituency.
Nalor ki program bapher ba kynthup ïa ki jingshad ki jingrwai na ki samla ka thaiñ, ki jingai jingkren bapher bapher na ki riewrangbah bad ki nongïalam, u Bah Banteidor u la ïa shad lang bad ki paidbah ha ka por ba la pyllait ïa ka jingrwai elekshon ba la pynkhreh da ki samla ka Party.
Haba kren ha ka jingïalang, u Bah Banteidor u la ong ba um pat ju kren eiei ïa ka elekshon namar ki paidbah hi ki phah ïa u ban trei da ka kam. “Hynrei ki khun samla ka thaiñ ki kwah ban ïa don lang da ka kynhun treikam kata lyngba ka PDYF hapoh ka Zonal Committee bad mynta ka sngi ngi pynskhem ïa ka jingïatylli jong ki ha ka Party”, u la ong da kaba bynrap da kaba ong ba u trei la ka kam ban ïa kaba jam ka ktien.
U Bah Banteidor u la ai khublei ïa u Bah Prestone Tynsong, Symbud Myntri Rangbah ka Jylla bad nongïalam uba dang shen ha ka jingïalang ka NPP u la pynpaw ba yn pyndep noh ïa ka surok ba dang sah khyndiat eh ha Jongksha. “Kane ka jingai khublei ka dei namar katei ka surok ka dei kaba nga hi nga la dep leh lypa”, la ong u Bah Banteidor uba la kynthoh ba ka dei tang ka jingwan kam ei.
“Ka dei ka surok ba la pynrung na ka PMGSY bad dang ap jingmynjur na Delhi bad lada nud ban ong ban phah trei na ka State Plan te phah seh lada don ba nud ban trei khlem pisa”, u la ong da kaba bynrap ba ban shu kam ei te long beit tangba ma u hi un kam ïa ka jingshisha. U la ong ba ïa kiba thong da ka pisa ha ka jingïaid elekshon ki paidbah ki dei shim beit ban ïohnong ei.
Halor ka jingkylla ka tnad Sports bad kam rep ha ka Jylla ïa kaba u Myntri Rangbah hi u la dep kren, u Bah Banteidor u la ong ba ym dei ban pynklumar ïa ki paidbah da kaba pan passbook ne kiwei pat. “Peit ïoh dap ram kumba jia ha Rapleng”, la ong u Bah Banteidor halor ka jingpyrshang ïalam da ki katto katne halor ka FOCUS, ka skhim jingïarap sha ki nongrep kiba don ha ki Producer’s Group.
U la ong ba wat kob ba dei Party heh hynrei ki party rit kum ka PDF kan jop 7 ngut ha ka elekshon ban wan.
