Nongstoiñ, Naitung 11: Namar ba pynkheiñ ïa ka Inter-state migrant workmen act, ka KSU West Khasi Hills hynne ka sngi la la leit ban khynra bad pynphai ïa kumba 50 ngut ki bar jylla ba trei ha ki ar tylli ki Factory ha Rwiang bad ha ki bynta jong ka Sor Nongstoiñ bad Mairang.
Ha ka jingkhynra ka seng ha kine ki jaka, la lap shibun ka jingpynkheiñ aiñ, namar wat tang ïa ka Work Permit, Labour licence, Epic ban pynshisha ba ki dei ki nong India ruh kim don satia.
Na ka liang ka Seng ka la beh krad ïa ki sha ka jaka ba ki wan bad la maham ruh ïa ki trai ba wanrah ïa ki, ba lada jia kano kano ka jingbym sngew tynnad, ki hap ban shim ïa ka jingkitkhlieh.
Ka kyrwoh kaba shai na ka liang ka Seng ka long ba kan ïai bteng ban khynra ha kiba bun ki bynta jong ka District ha ki sngi ban wan. Namar kane ka jingkhynra ka dei shi bynta ruh ban pynsngew sha ka sorkar ïa ka jingdawa ban pynioh ILP.
Ha ka jingkhynra hapoh sor Nongstoiñ, la lam khmat da u Samla Comingstar Khardewsaw General Secretary jong ka KSU Nongstoiñ Circle, ha ka jingsynrang lang u Samla Blastarlan Kharbani Office Secretary jong ka KSU WKHDU.
