Pynhap pyrda u Bah James Lyngdoh ïa ka tamasa phutbol ha Madanriewblei

Nongstoiñ, Risaw, 9: Ha ka sngi saitjaiñ u bah James S.Lyndoh Vice president ka All India Trinamool Congress Meghalaya State, u la hiar sha madan riewblei ban pynkut ïa ka tamasa phutbol kaba la pynlong da ka Nongstoiñ Block Trinamool Congress. Ha katei ka sngi la synran lang ïa u da u bah Macmillan Kharbani, President ka Nongstoiñ Block Trinamool Congress u ban sa ïa aireng ha ka election ka ban long ha u snem ban wan na katei ka party napoh Nongstoiñ constituency.
Na ka liang u bah Macmillan Kharbani haba ai jingkren u la pynshai ba ka jingpynlong jong ka party ïa katei ka lyngpung ïalehkai, ka long ban wanrah ka jingsngewjan hapdeng ki samla jong ka thaiñ bad ban kyntiew ïa ka jingïalehkai phutbol na ka bynta ki samla.
U la pynkynmaw ruh ba ki samla ka West Khasi Hills ki dei kiba don ka sap ka phong kaba paka ha ki kam ïalehkai sport khamtam eh ha ka phutbol. Hynrei na ka daw jong ka jingbym don ïa ki jaka pyntbit kiba biang ka sap jong ki samla ka shu sep ei khlem lar kam.
Ha kajuh ka por u la ong ba ka madan riewblei ka dei ka jaka pdeng kaba paka tam ban buh ïa ka coaching centre na ka bynta ki samla ïalehkai phutbol bad ka madan ruh ka dang donkam ban pynbha shuh shuh .
U bah James Lyngdoh haba ai jingkren u la ong ba ha kine ki sngi ka phutbol kam dei shuh tang ka jingïalehkai sport, hynrei ka la kylla long ka lad aikam ai jam bad ka lad kamai kaba ai jingmyntoi haduh katta katta ïa ki samla kiba don sap ha ka phutbol. U la kyntu ruh ïa ki samla ba haba ki ïalehkai kim dei ban don ka mynsiem khong khong ne ka mynsiem bitar, hynrei kin ïaleh da ka jingieit bad ka mynsiem ïalehkai kaba shisha.
Ha katei ka lympung ïalehkai ki don kumba 32 tylli ki kynhun ïalehkai kiba la wan ban ïahim bynta hynrei kiba la poi sha kaba kut ban ïaknieh ïa ka nam lahduh ka dei ka Mawkynbat SC pyrshah ïa ka Mawlangkhar SC, ha kaba ka Mawkynbat ka la jop da shi kol la nod bad rah ïa ka nam lahduh. U kongsan u la sam ïa ki khusnam da ki trophy bad ka song pisa kaba laiphew hajar tyngka ïa ka ba jop bad hynriew hajar tyngka ïa kaba wan ba ar.