Pynhap pyrda ka St. Michael & All Angels’ Secondary School ïa ka jingrakhe Jubilee Rupa

Jowai, Risaw 30: Ka St. Michael & All Angels’ Secondary School, Jowai mynta ka sngi 30 tarik u Risaw kala ïoh ban pynhap pyrda ïaka jingrakhe lehkmen ‘Jubilee Rupa’ ne ka jingdap 25 snem ka jingshakri haka liang ka pule ka puthi.
Ïa ka jingïalang la pynlong ha phyllaw jong katei hi ka skul ha kaba u Paiadaohi Lhuid uba dei u Executive Engineering ka tnad PWD Building, Jowai ula long kum u kongsan, haka jingdonlang u ma M. Gatphoh Headmaster jong ka skul, Rev. Dn.N.W Lyngdoh, ka Dr. Harshada Lamin MBBS, MS/MD obst & Gyne kaba dei ruh ka (1 batch student) ka skul, ki kmie ki kpa, ki khynnah skul nalor kiwei de kiba la shah khot sngewbha. U ma M. Gatphoh, Headmaster jong ka skul haba pynsngew ïa ka History jong ka skul ula ong ba ïa kane ka skul la seng ha u snem 1999 lyngba ki Missionary bad mynta ka skul kala ïaid shakhmat ha ka jingshakri ban kynjoh sha ka Secondary Level bad ka thong jong ki nongseng ïa kane ka sngi ka long ban ai ka jingshakri kaba bha tam ha ka pule ka puthi bad haka imlang ka sahlang kumjuh.
Ha ki jingïaid lynti jong ka skul 25 snem kala ïoh shibun ki jingjop bad dei ha u snem 2011 la plie ïa ka Secondary Level ha kaba la don iwei i kynnnah ban ïakhun ïa ka SSLC bad ila pass, lyngba kane kala plie shuh shuh ka jingkhang na ka bynta ki nongwan pule ban ïakhun ïa kane ka Exam bad ka skul kala pass 100 percent haka exam SSLC kaba dang shu dep.
Ka skul kala ïoh shibun ki khunsnam ha ki jingïakop proh jabieng bapher bapher bad kumjuh ha ki jingïalehkai Sports. Ha ka juh ka por u ma Gatphoh ula kyntu ïa u kongsan jong kane ka sngi ba un ïarap ban pynsngew sha u MLA ka thaiñ halor ki jingdonkam jong ka skul naduh ka Building jong ka skul ban pynheh ïa ki klas room, ki kamra Computer, ka madan ïalehkai bad ka Hall jong ka skul kiba la donkam ban pyndep kloi.
Katba na ka liang u kongsan ma Paiadaohi Lhuit haka jingkren ula pynpaw ka jingsngewkmen ban wan ïadonlang ha kane ka sngi pynhap pyrda ïa ka jingrakhe, da kaba u kitbok ïa ki dkhot ka SMC bad ki nonghikai ba kin dang ïaid shakhmat ban ai jingshakri ïa ki khynnah skul. Shuh shuh u ong haka jingïaid lynti ba 25 snem (1999-2024) kam long kaba suk hynrei ki don shibun ki jingeh bad u ai khublei ba ka skul kala la ïoh ban pynmih mynta ïa kawei ka Doctor kyrmen ba kin dang bun shuh shuh kiba bat ïa ki kyrdan bapher bapher bad kumjuh haka saiñ hima sima.
Ula kyntu ïa ki khynnah skul ba kin long kiba minot thop haka jingim bad kiba trei shitom namar ka pyrthei mynta ka long kaba eh bad kaba don jingïakhun (Competition) ha baroh ki liang.
La pynphuh shuh shuh ïa kane ka sngi da ki jingrwai pdiang na ki nonghikai, ki jingshad tynrai, ki jingrwai na ki khynnah skul, ka jingsam ïa ki khusnam sha ki nonghikai bad kumjuh sha ki khynnah skul.