Shillong, Risaw 17: Ka Junior Christian Endeavour Society (JCES) Mawkhar, Mawkhar Presbyterian Church, ha ka sngi Thohdieng ka la pynlong ïa ka jingïaseng pynkut ïa ka jingdap 125 snem (1900-2025), ne ka Quasquicentennial Jubilee.
Ka phang pdeng jong kane ka jingpynhab pyrda noh ïa kane ka jingrakhe dap 125 snem ka JCES ka long, “Hakhmih ki khun ki long ka jingïoh kynti U Trai” Salm: 123.3.
Ha kane ka sngi la wan ban long kongsan da u Rev Pastor D E Syiem uba ha ka jingkren u la pynpaw ïa ka jingkmen kaba khraw ba kum ki khun ka Balang ki la ïoh ban rakhe ïa kane ka Jubilee naduh ba la seng ïa ka.
U la pynpaw ruh ïa ka jingsngew bynñiaw ïa kito kiwei pat ki dkhot kiba la leit noh ne kiba la khlad noh shwa ba kim ïoh shuh ïa kane ka lad ban ïa don bynta lang.
“Kane ka kynhun ka long kaba kongsan bha naba ka dei kaba tei ïa ka jinglong bad ka jingim jong ki hep kiba rit ba ynda ki la heh la san kin long ka nuksa kaba bha ïa ka Balang bad kumjuh ruh kum ki nongtei ïa ka imlang sahlang kaba bha. Ngi ngeit ba kine ki hep kiba rit kiba ïoh kane ka lad ban ïashim bynta ha kane ka jingrakhe ïa ka jingdap 125 snem ka JCES kan long ka jingmyntoi ïa ka lawei jong ki ba ha ka shisien ka sngi kin sa kynmaw biang ïa kane ka jingrakhe ynda ki la heh la san,” ong u Rev. B E Syiem. Kum u kongsan u Rev D E Syiem u la pyllait ruh ïa ka kot sah kynmaw ne ka Souvenir jong ka JCES halor kane ka jingrakhe, bad u la pyllait bad pynher ruh ïa ki balloon kum ka dak ka jinglehkmen ha kane ka sngi.
La ïoh ka jingduwai kyrkhu pynkut na u Rev. B Syiem, la ïoh ruh ka jingduwai bad pule ïa ka ktien U Blei na ka samla Evangeleen Wanniang, nangta ka jingrwai ba pynsngew tynnad bad pynshoh beij na ki hep kiba rit bad la pynïaid pat ïa ka prokram pynhab pyrda da u Tbn A Syiemlieh bad ka jingïashim bynta jong ki paid riewngeit, ki kmie ki kpa bad kiwei kiwei.
Kane ka jingrakhe kadei ruh kaba la pynlong ha ka sngi Thohdieng, kan kut ha ka 19 tarik mynta u bnai da ka jingïaseng bad kiwei pat ki prokram.
