Shillong, K’lyngkot, 03: Ka Dorbar Shnong jong ka shnong Mawsynram ha ka sngi Thohdieng ka la ïai ban ba kan ym pyndem ha kano kano ka jingshah pynbor hynrei kan ïai bteng beit ban mana ba ym dei ban pynlong ïa ka jingmane blei hapoh ka krem Mawjymbuiñ, namarba ka dei ka jaka jngohkai pyrthei.
Ha ka jingïakren bad ki lad pathai khubor hadien ba la wai ka jingïalang ba la khot da ka Deputy Commissioner jong ka East Khasi Hills ka Kong RM Kurbah, u Assistant Rangbah Shnong jong ka Dorbar Shnong Mawsynram u Bah Hiamdor Rapsang uba long ruh u Nongaiktien jong ka Dorbar Shnong u la ong ba ka Dorbar Shnong Mawsynram ka dei ka trai jaka jong ka krem Mawjymbuiñ bad naduh kaba sdang ym shym la shah ïano ïano ruh ban mane blei hapoh ka krem.
“Naduh kaba sdang haduh mynta, ngim ju shah ïa kano kano ka kynhun ban wan bad ban pynlong ïa ka jinglehniam hapoh ka krem,” u la ong.
Da kaba pynpaw ba kam ym shym la khang ïa ki paidbah ban leit jngoh ïa ka krem, u Bah Rapsang u la ong, “watla katta, kino kino ki riewshimet ne kino kino ki kynhun ki lah ban leit jngoh ïa ka krem hynrei ki dei ban burom ïa ki kyndon ba la buh da ka Dorbar Shnong, ïa kaba ngi la mana tyngeh ba ym bit satia ban mane blei hapoh ka krem bad ban pynlong ïa ka krem kum ka mandir ne ka temple namarba ka krem ka dei ka jaka jngohkai pyrthei. Ngi hap ban burom ïa baroh ki nongjngohkai, kiba wan jngoh ïa ka krem.”
Da kaba kdew ruh ïa ki jingjia ha ki snem ba la leit noh ha kaba ki paidbah ki ju lehniam jubor hapoh ka krem, u Assistant Rangbah Shnong ka Mawsynram u la ong, “ha ki snem ba ladep, ki ju wan bad theh dud bad thang ïa ki dhup jingiwbih bad ber syntiew- kat haduh ba ka pynjaboh ïa ka krem bad ïa ki sawdong sawkun. Namarkata, ka Dorbar Shnong ka la hap ban buh da ki Volunteer ban peit khnang ban ym shah ïa kine kiei kiei namarba ngi kwah ban pynneh pynsah bad ban ïada ïa ka krem.”
“Lada ki paidbah ki pynkheiñ ïa ki kyndon, ka dorbar shnong kan pynshitom katkum ki kyndon aiñ,” u la maham.
Katkum ka jingong jong u, ïa ka krem la plie na ka bynta baroh ki nongjngohkai pyrthei naduh ka por 9:00 baje mynstep haduh ka por 5:00 baje janmiet manla ka sngi.
Haba kylli, u Bah Rapsang u la ong, “kine ki briew ki kwah ïa ngi ba ngin ai jingbit ïa ki ban pynlong ïa ki jinglehniam hynrei ngi la kyntait mardor namarba ka krem kam dei ka jaka mane blei. Ngi la pynpaw da kaba shai ba ki lah ban wan jngoh tangba kin hap ban bud pyrkhing ïa ki kyndon ba la buh da ka dorbar shnong.”
U la ong ruh ba ka KSP ka la shah ïalam bakla ha kaba ïadei bad ka kynrum kynram jong ka krem Mawjymbuiñ.
“Hynrei, ynda ki (KSP) la wan mynta ka sngi hangne ki la kubur ïa kata. Na baroh ki bynta jong ka ri India, ki paidbah ki wan sha krem Mawjymbuiñ, khamtam ha ki taiew ba kyrpang jong ki. Haba ki ïohi ïa ki signboard ba la thoh ruh ïa ki kyndon, ki ong ba ki da sngewhun ba ki ïoh ban leit jngoh ïa ka jaka. Lada ka dei ka temple jong ngi, ki lah ban leh katba ki kwah hynrei namarba ka dei ka jaka jngohkai pyrthei, kumno kin shu pynkylla ïa ka sha ka temple, khamtam haba ka dei ka nongkynti jong kiwei? u la buh jingkylli da kaba pynpaw ruh ïa ka nongrim ka Dorbar Shnong ka la ong, “ngin bat beit ïa ki kyndon la ka long sa kumno kumno ruh. Ai ba ka jingpynbor kan wan na kano kano ka liang, ngin bat beit ïa kata bad ngin bat beit ïa ki kyndon jong ka dorbar shnong.”
Shuh shuh u Bah Rapsang u la ïathuh ba ha ka jingïalang la pynkut noh ïa ki jingbym ïasngewthuh jingmut namarba kam shym la don satia ka jingkhang ïano ïano ruh ban leit jngoh ïa ka krem Mawjymbuiñ.
“Ka KSP Assam ka la shah ïalam bakla ha ki riewshimet, kiba pyrshang ban ïalam bakla ba la shah ban mane blei hapoh krem (hynrei ka long kaba bakla shikatdei eh),” u la ong.
