Shillong, Nailur 11 : Ki nonghikai ha ka Jylla hapoh ka lama jong ka Meghalaya College Teacher’s Association ha ka sngi Nyngkong ki la shim biang ïa ka rai ban bteng ïa ka jingsangeh shim klas hadien ba ka jingïakren bad u Vice Chancellor ka skulbah NEHU, u Prof P Shankar Shukla kam shym la poi shaei shaei ruh.
Haba kren bad ki lad pathai khubor, u General Secretary ka MCTA, Bah AW Rani u la ïathuh ba wat hadien ka jingïakren kaba la neh haduh lai kynta ruh na ka liang u Vice Chancellor u la kyntait ban pyndam noh ïa ka notification kaba la pynmih ha ka 12tarik u Naitung kaba bthah ïa baroh ki college ba pynïasoh ban pyntreikam noh ïa ka National Education Policy (NEP) 2020.
“Na ka liang u VC u la kyntait ban weng ïa katei ka notification hynrei u la mynjur pat ban rah ïa ka ha ka jingïalang jong ka Academic Council na bynta ban pynbeit ïa ka,” u la ong da kaba bynrap ba lada um lah ban weng ïa ka, kumno pat kin khmih lynti ba yn weng noh ïa ka jingïakhih jong ki.
Nalorkata, u ong ru ba kadei ka jingthok im im peit peit ba katei ka notification ak kam ba ïa ka NEP yn pyntreikam katkum ka rai ba la shim da ka 110th Academic Council.
Utei u nongïalam ki nonghikai college u la ong ba u VC u la kubur ba ka don ka jingthut ha kaba ïadei bad katei ka notification.
“Haba ngi kylli la kin weng noh neem ïa ka notification, u VC u la jubab ba kin ym weng namar bun na ki college ki la ïaid shakhmat ban pyntreikam ïa ki course thymmai hapoh ka NEP bad haduh mynta ym don uwei ruh u principal ban pyntip ba kim lah ban pyntreikam ïa ka course degree kaba thymmai,” la ïathuh shuh shuh u Bah Rani.
