Pyneh beit triang kiba die madan wat hapdeng ba don ki Magistrate bad pulit ban kyndang na Khyndailad

Shillong, Jylliew 30: Ki bor pynïaid District ki la leit ban kyndang ia kiba shong die madan ha ka thain Khyndailad, Police Bazaar bad ia kane ki la leh ha ka step jong ka sngi Nyngkong, ia kine la kyndang naba ki khlem don ia ki Certificate of Vending ne COV ba laA ai ne ïoh na ka Shillong Municipal Board, bad ha kane ka sngi la ïohi ba kiba dei madan ki la pyneh hi triang ban mih na ka jaka ba ki ju die madan manla ka sngi.
ïa kane ka jingkyndang ïa ki dukan madan ka la sdang naduh ka por mynstep bad ka jingkyndang ka long beit thik tang ïa kito ki dukan ki bym don ïa ki CoV ha ryngkat ka jingdonlang ki Magistrate. Hynrei la ïohi pat ba ïa kiba don CoV la ai por ba kin kynriah noh ïa ki dukan jong ki sha ki jaka ba la ai da ka Sorkar ha ka Vending Zone kaba la buh ha ka mala kaba halor duh jong ka MUDA complex.
Ha kane ka jingkyndang ïa kiba die madan la ïohi ïa ka jingïania kaba jur bha hapdeng kiba die madan bad ki bor pynïaid ha kane ka sngi.
La ïohi ba naduh ka por mynstep ki la don ki dukan kiba la shah kit noh ïa ki tiar ki tar ha ki trok jong ka Shillong Municipal Board.
Lah ban ong ba kane kadei ka sienjam ba la shim da ka bor District ka dei ka rai jong ka Sorkar Jylla hadien ba ka la pynbna ïa ka Khyndailad kum ka ‘No Vending Zone” ban lah wanrah ïa ka jingkylluid ki surok ba ïaid ki kali, ki lynti ba ïaid briew ban wanrah ïa ka jingshngaiñ bad khamtam eh ban pynurlong ïa ka jingthmu ban pynkylla ïa ka Khyndailad kum ka Pedestrian Zone lane ka jaka ïaid kjat ki paidbah bad ka jaka kaba khring ïa kiba ieid ïa ka put ka tem bad kumjuh ruh ka ban khring bad pdiang ïa ki nongwanngohkai sha Shillong.
ïa kine ki dukan ba don CoV la ai por khatduh ba kin pynkynriah ïa ka dukan haduh ka 22 tarik u Naitung.
Lah ban pynkynmaw ba katkum ka jingïathuh u Myntri Sorkar u Bah Paul Lyngdoh, ka Urban Affairs ka la dep shna haduh 400 tylli ki dukan ban pynshong ïa ki briew ba ju shong dukan madan ha MUDA Complex. U pyntip ba ïa mynta, ki dang don tang 248 ngut kiba la pynthikna ban pynkynriah noh ïa ki dukan jong ki sha kane ka Vending Zone kaba la dep ban pynkhreh da ka sorkar jylla.
Ha kawei pat ka liang ki nongdie madan ha Khyndailad ki la pyneh hi triang ban mih na katei ka jaka wat hadien ba ki bor pynïaid District, ka Shillong Municipal Board, ki la sdang biang ban kyndang bad ban khmih ruh ïa ki Certificate of Vending na kiba die madan ha ka por 2 baje nohphai sngi.
Ha kane ka wat kaba ar la ïohi ba kiba die madan ki la pyneh hi triang, ha kaba ka la mih ka jingïania bad ki ophisar, ki pulit naba la thmu ban phah song noh ïa ki tiar ki tar na ki jaka ba ki shongdie jingdie.
Kine kiba die madan ki la ïeng ruh ha la ki jong ki jaka ba ki die ban khanglad ïa ki bor pynïaid ba kin ym ïoh lad ban kit ïa ki tiar jong ki bad hadien ba ki bor pynïaid kim nud shuh ban kit kiba die madan ki la ïakynhoi ïa risa bad thab ruh la ki kti ïa ki bor pynïaid kiba la wan ha ka sien kaba ar.
Lah ban ïathuh hangne ba ka jingkyndang ka la sdang naduh ka por mynstep ha kaba ki la don ruh ki tiar ki tar kiba la shah kit, shah thep ha ki kali ka Shillong Municipal Board.