Shillong, Naiwieng 16 : Ka Tnat Arts & Culture jong ka sorkar jylla ha ka sngi Thohdieng ka la plie ïa la ka jong ka Jan Jatiya Divas ha Conference Room, Main Secretariat, Shillong. Ha kane ka prokram na ka liang u Myntri ka Arts & Culture u Bah Paul Lyngdoh u la shim bynta kum u kongsan ha ka jingïadonlang u Bah F.R Kharkongor, Principal Secretary, Department of Arts & Culture, ki heh ophisar bad ki nongtrei ka tnat.
Haba kren ha kane ka sngi na ka liang u Myntri ka tnat Arts & Culture u Bah Paul Lyngdoh, u la ong ba ka Janjatiya Gaurav Divas la rakhe ha kylleng jong ka ri ha ka 15 tarik mynta u bnai ban kynmaw ïa ki riew ïaleh laitluid.
Shuh shuh u Bah Lyngdoh u la bynrap da kaba ong ba ïa kane ka sngi la rakhe ruh ïa ka sngikha jong Bhagwan Birsa Munda, ba dei nongïalam jong ki riewlum bad uba dei ruh u nongïakhun laitluid ha kaba kane ka kam jong u ka la ai mynsiem ïa baroh. Kane ka prokram ka ïathuh ruh halor ka bynta kaba kongsan jong ki kynhun riewlum ban pynneh ïa ka jinghiar pateng.
Ha kane ka prokram kaba kyrpang na ka liang ka jylla ka shim ïa kabu ban burom bad kynmaw ïa ki jingnoh synniang jong ki riew ïaleh laitluid na ka jylla ruh kum u Tirot Sing, Kiang Nangbah, Pa Togan Sangma, Phan Nonglait, bad kiwei ruh kumjuh. Kine ki riewshimet, ha kaba ki jingaiti jong ki ka la long na ka bynta ka jingïoh laitluid ha kaba kane ka la neh haduh mynta mynne na ka daw jong ka jingshlur bad ka jinglen lade, u la bynrap.
Na ka liang u Myntri u la bynrap ruh da kaba ong, “Ngim dei ruh tang ban shu kynmaw ïa ki jinglenlade ba la leh da kine ki nongïakhun laitluid, hynrei kane ka la bsuh ïa ka jingmut jong ka jinglaitluid khamtam jong ki trai ri trai muluk. Kane ka pynsah kynmaw ruh ïa ka khana pateng jong ka jingriewspah ban saiñdur ïa ka jylla bad ki briew jong ka.”
Ha kane ka prokram na ka liang u Myntri u la pyllait ruh ïa ki Adi Sanskriti Video-Digital Tribal Art series of Meghalaya, kaba dei ruh kaba la pynwan dur halor ki riewshlur jong ka Meghalaya ba la shna da Sauramandala bad kumjuh ruh u la pyllait ïa ka Tri Hills Creatives & Tri Hills Festival calendar.
