Pyndep shwa ïa ki jutang shwa ban plie ïa ka Ayush Hospital Sohra, dawa ka DS Khliehshnong

Shillong, Jylliew 15 : Ka Dorbar Shnong Khliehshnong Sohra ka la kyntu ïa ka tnad ka Koit ka Khiah ka sorkar jylla ba kan pyndep shwa ïa ki jutang kiba la ïateh ha shwa ba kan plie noh ïa ka Ayush Hospital ba 50 jingthiah kaba don ha katei ka thain.
Haba kren bad ki lad pathai khubo, u Rangbah Shnong ka Khliehshnong Sohra, Dr. Shembhalang Kharwanlang u la ïathuh ba kane ka hospital Ayush kan long ka jingmyntoi kaba khraw ïa ki nongshong shnong ka thain kaba kynthup ym tang ka Sohra hynrei ïa ka thain Shella baroh kawei.
“Hynrei ïa ka jaka ban tei ïa ka hospital la ai ei da ka Dorbar Shnong Khliehshnong, Sohra khlem kano kano ka jingsiew kaba la poi sha ka lai akar shiteng. Tangba ka la don ka jingïateh jutang hapdeng ka sorkar lyngba ka DMHO, East Khasi Hills bad ka Dorbar Shnong halor kane,” u la ong.
La ïathuh ba kane ka hospital mynta ka la jan dep bad wat ki dawa ruh ki la poi nalor ki doktor bad ki nongtrei, nangta ki tiar kum ki jingthiah, ki miej bad kiwei kiwei. Hynrei, u la ong ba na ka liang ka Dorbar Shnong pat ka sah lyngoh namar watla ka kam ka la ïaid shakhmat bad sa tang ban plie noh hynrei ka sorkar pat kam pat pyndep satia ïa ka jutang kaba ka la dep ban kular bad khlei.
La ïathuh ba ki katto katne ki bynta kiba sorkar kadei ban pyndep ïa ka jingkular ha shwa ban plie ïa katei ka hospital ka long ban don da ki jaka bret jakhlia kiba paka khamtam ïa kito ki jakhlia kiba mih na ki hospital khnang ba kan ym pynjaboh ïa ka mei mariang. Shuh shuh la ong ba kane ka mat kadei kaba donkam bha namar ha syndah jong katei ka hospital ka don ka tyllong um jong ka shnong Nohkalikai.
U Rangbah Shnong u la ong ruh ba ka long kaba sngewsih ba ka tnad ka koit ka khiah kam burom ïa ka kular ba la ïa soi bad haduh mynta kam ai ïa ka thup kyrteng ki samla na shnong ki ban ïoh kam ïoh jam ha katei ka Hospital wat hadien ba la buh ïa ka jingtyrwa.