Pyndep ki 278 ngut ki nongïalehkai ïa ka jingkyntiap klob ha ka Inter-District Transfer 2026 jong ka MFA

Shillong, ïaïong 08: Ka Meghalaya Football Association (MFA) ka la pyllait paidbah ïa ka thup kyrteng jong ki nongïalehkai kiba la ïoh ïa ka jingmynjur ban kynriah kynhun hapdeng ki distrik na ka bynta u snem 2026.
Ka transfer window ka la kut ha ka 31 tarik u Lber, bad ki la don baroh 278 ngut ki nongïalehkai kiba la apply bad pyndep ïa ka jingkyntiap klob. Kane ka la hiar na ka 329 ngut ha u snem 2025 hynrei ka dang kham bun haba nujor ïa ka 122 ngut ha u snem 2024.
Ki kynhun ïalehkai ba ïasoh bad ka Shillong Sports Association ki la soi 80 ngut ki nongïalehkai na kiwei pat ki synjuk district. Ki klob kiba dei jong ka Thadlaskein Sports Association (56) bad ka East Jaiñtia Hills District Football Association (42) ruh ki la shim bynta bha ban soi nongïalehkai ha ka por ba dang plie ïa ka transfer window.
La sngewthuh ba ki klob ki la pyndonkam ïa kane ka transfer window ban pynkhlaiñ ïa la ki jong ki kynhun hashwa ba ki District Association bapher bapher kin pynlong ïa la ki jong ki league jong ki na ka bynta u snem 2026 bad tang shuwa ban sdang ïa ka 5th Meghalaya State League, ba la pynlong da ka MFA na ka bynta ki klob kiba don ha ka kyrdan ba ha khlieh duh ha ka jylla, ka ban sdang ha kaba kut jong une u bnai.
Haba kren halor kane ka transfer window, u General Secretary ka MFA u bah Sunesh Syiem u la pynkynmaw ïa baroh ki synjuk phutbol district ba yn ym don u nongïalehkai uba lah ban ïalehkai na ka bynta palat ïa kawei ka District Sports Association ha ka shisnem. “Sngewbha kynmaw ba lada lap ba don kino kino ki nongïalehkai kiba pynkheiñ ïa kine ki kyndon, baroh ar u nongïalehkai bad kumjuh ruh ka synjuk district kin shah pynshitom ha ka MFA katkum ba la shim ba ka long kaba dei,” u la bynrap.