Nongpoh, Lber 14: Kumba 30 ngut ki samla naka them Ri-Bhoi mynta ka sngi kila iohpdiang ïaka syrnod lem bad ki tiar khap shñiuh hadien ba kila pyndep ïaka jingshah hikai khap shñiuh kaba 1 bnai lynter bala sdang naduh u bnai Rymphang haka shnong Nongjri bad kane ka long ka jingai mynsiem ïa kiba bun ki khun samla ba kim dei ban ud kyrduh kam bad ban sngewpoh ïa kano kano ka kam namar ka jingknieh hi ïaka khaii ka pateng naki bar jylla ka dei ka ILP kaba khlaiñ kumba la pynpaw uwei naki samla bala pyndep jinghikai khap shñiuh.
Kaba kham sngewtynnad ban ïoh sngew ka long ba napdeng kitei ki 30 ngut ki khun samla shynrang kiba la ïoh ïaka jingshah hikai haka kam khap sñiuh, 9 ngut ki la ïoh ban trei haki dukan riew shimet, 7 ngut ki la sdang ban seng hi ïa ka dukan la jong, bad 11 ngut ki la don ka jing thmu ban seng ïa ki dukan lyngba ki scheme sorkar kum ka PMEGP bad ka kiwei kiwei ki jingïarap lyngba ki ram na ki Bank bad 3 ngut pat ki dang don ka jingthmu ban leit pyntbit shuh shuh ïa lade sha ka Advance Training ban dang pynjanai ïaka sap khap shñiuh ka jong ki.
Ïa katei ka jingshah hikai kaba hapoh jong ka SANKALP Aspirational Skilling Abhiyan project halor ka Men’s Salon kaba la dep ban pynlong haka shnong Nongjri la pynïaid daka ophis jong u Deputy Commissioner Ri Bhoi District haka jing ïa trei ryngkat lang bad ka El Elyon Institute bad ka Meghalaya State Skill Development Society.
Ha kane ka sngi la wan ban sam ïaki syrnod da u Deputy Commissioner ka Ri Bhoi u Arpit Upadhyay IAS haka jingdon lang u H Decruse General Manager DCIC, kong S Nongbri Skills Development Officer Ri Bhoi lem bad ki nongpynïaid ka El Elyon Institute kiba kynthup ïa u Samla Saiñ Kupar Syngkli bad ka Samla Darihun Lyngdoh.
Haba kren ha katei ka sngi, u Deputy Commis-sioner ka Ri Bhoi u Arpit Upadhyay kum u kongsan u la ka jingkhublei ia katei ka shlem ai jinghikai ka El Elyon Institute kaba la shimkhia ban pyndep ïaka jingai jinghikai ha ki kam khap shñiuh sha ki khun samla kaba long ruh kum ka jingplie lad ïaki kumno ban sdang ban seng kam bad ban ïeng ha la ki jong ki kjat.
U DC la Ri Bhoi u la ong ruh ba kano kano ka kam kaba khraw ka sdang shwa naki barit, kumta u la ai ki kyntien kyntu kynpham sha ki samla ba kim dei ban kheiñ poh ïa kane ka kam khap shñiuh, hynrei to shim ïaka kum kawei naki kam ka ban lah ban kyrshan ïaka ïing ka sem. U la kyntu ruh ba ki dei ban nang ïai trei shitom bad ban nang pynkhraw ïaka kam khnang ba kin long ruh ki nongaikam ai jam sha kiwei pat ki khun samla.
U Deputy commis-sioner ka Ri Bhoi u la kitbok kitwriang ruh ïaki samla ba kin nangleh bha haka jingim ka jong ki khnang ba kaei kaba ki jinghikai ki la ioh kan nym long leh nohei bad kumjuh u la kitbok ruh ïa katei ka shlem ai jinghikai ba kan nang iai bteng ban pynlong kum kine ki jingai jinghikai bad u la tyrwa ruh ba naka liang ka ophis jong u kan nang ai ka jingkyrshan ban ïa trei ryngkat khnang ba kan long ka jingmyntoi iaki khun samla ym tang jong ka District hynrei haka jylla hi baroh kawei.
