Shillong, Naitung 12: Ka sorkar jylla ka la pyndam noh ïa ka jingpyntreikam ïa ka ‘smart road’ project hadien ba la shem ba kam long kaba lah ban trei pyndep. Hynrei na ka liang ka sorkar mynta ka la pynkhreh ïa ka jingtyrwa kaba thymmai na ka bynta baroh ki surok ha ka Nongbah ha ka jaka jong ka smart road.
Ka smart road, kaba ym shym la lah ban pyndep hapoh ka thaiñ Lachumiere, ka la dei kawei napdeng ki 17 tylli ki Smart City project ba la pyntreikam ha ka jylla.
“Ïa ka first phase jong ka smart road project la pyndam noh. Ngi la dep pynlong ka jingïalang ha ka jingïadonlang u Symbud Myntri Rangbah uba khmih ïa ka tnat PWD (Roads) bad nga namar ngi mad shibun ki jingeh ban pyntreikam ïa ka project. Namar kata ngi la pyndam noh ïa ka. Tang kumba 3-4% ki jingtrei ba la pyndep,” ong u Symbud Myntri Rangbah uba khmih ïa ka Tnat Pynroi Sor u Bah Sniawbhalang Dhar haba kren sha ki lad pathai khubor ha ka sngi Thohdieng.
“Halor kane, ngi la rai ba ngin buh noh da ka jingmang kaba thymmai napoh ka state plan. Ngin pyrshang ban khmih ïa baroh ki surok hapoh ka nongbah. Kan long hi kum ka smart road kaba na ka state plan lyngba ka tnat PWD. Kumta ka jingpynkhreh ïa ka DPR ka la ïaid shaid shaid mynta,” u la ong.
Haba kylli, u Bah Dhar u la pyntip, “Ngi la pyndam noh ïa ka, naba ka long ka bym lah long bad ym lah ban ïoh jaka, ki ophisar kin shna ïa ka financial bill ka bym pura. Namar kata ngi la rai ban khmih ïa baroh ki surok kiba donkam hapoh ka nongbah.” Katkum ka jingong jong u, tang khyndiat ka pisa la dep ban pynlut halor katei ka smart road project kaba khlem lah ban pyndep.
“Khyndiat ki project lah ban plie noh ha u bnai Nailar bad Nailur. Katkum ka kaiphod baroh ki project ki la long ha ka jingtreikam kaba bha. Kumta da ka jingkyrmen nga tharai kin long kiba ïarap bha ïa ki paidbah, kum ka nuksa, haba ki ïew kum ka ïew Polo, Laitumkhrah market, ICCC ki la dep bad la long ban pyndonkam. Kumba long mynta na baroh ar kata na ka smart city bad na ka state plan kumjuh ki la don kumba 12-13 tylli ki parking kiba la pynïaid ïa ki kam mynta. Ngi dang khmih bad ki officer jong nga ki don ha ka kam ban pynthikna ba kine ki project kin dep ha ka por ba la buh,” u la ong.
Haba kylli la kane ka jingkhynra kaba khlem ïohbor ïa ki nongbylla bar jylla ka la ktah ne em ïa ki projek kiba dang pyntrei, u Bah Dhar u la ong, “Kumba long mynta nga khlem ïoh kano kano kaiphod ne jingujor. Lada ka don ka jingshah pynthut kumta nga kyrpad ïa baroh ki paralok sengbhalang ban ïatreilang bad ka sorkar.”
“Ki nongbylla na ka jylla kin don barabor bad kin don ruh ki kam kiba ki nongbylla ka jylla kim lah ban leh. Kumta ngi kyrpad ïa ki ban ïatreilang. Ngi ju kyrpad barabor ïa ki contractor ne agency ban pynthikna ïa ki kot ki sla,” u la bynrap.
