Nongpoh, Nailur 29: Kum ka jingleh burom bad ka jingrakhe ïa ka dap ba 154 snem ka sngi kha jong u Mahathma Gandhi ka ba la ju rakhe man la u snem ha ka 2 tarik u Risaw, na ka liang u Deputy Commissioner ka Ri Bhoi u la pynbna ba ha katei ka sngi kan dei ka sngi tyrkhong kyiad ha RI Bhoi District.
Kane ka jingpynhbna ba katei ka sng kan dei kum ka sngi tyrkhong kyiad ha Ri Bhoi ka dei kaba la pynkup bor katkum ka Sec 52 (I) jong ka ME Act ( Assam Excise Act and Rules), ha kaba baroh ki dukan kyiad, bad ki jaka pynmih kyiad ki hap ban khang khyrdep bad lada ki leh pyrshah kin shah pynshitom katkum katei ka kyndon aiñ.
Shuh shuh, la pyntip ruh ba ha katei ka sngi la pynbna kum ka sngi tyrkhong kyiad ka long ruh shi bynta ban ïa snoh kti lang na ka bynta ban leh burom ne kynmaw burom ïa une u nongïalam ba khaw jong ka ri India.
