Shillong, Naiwieng, 14: Ki kynhun bapher bapher kiba don hapoh ka shatri jong ka Meghalaya Indigeneous Tribal Constitutional Rights Movement (MITCRM) kiba kynthup ïa ka Synjuk ki Nongsynshar ka Bri Hynñiewtrep, ka Lympung ki Seng Kynthei, ka KSU, HNYF bad FKJGP ha ka sngi Palei ki la pynbna ïa u Vice Chancellor ka skulbah NEHU u Prof. PS Shukla kum u briew ba la kyntait.
Kane ka jingpynbna jong ka MITCRM ka long hadien ka jingleit jngoh ïa ki samla pule ka skulbah NEHU kiba dang ïai bteng ban pynlong ka jingshah thngan mynta la 10 sngi kynthih ban dawa hiar shuki ïa u Vice Chancellor.
Ha ka jingïakren bad ki lad pathai khubor, u General Secretary jong ka Synjuk ki Nongsynshar ka Bri u Hynniewtrep u Bah R.L Blah u la ong, “haba ngi ïohi ïa ka kynrum kynram ngim banse ban wan iuhkjat bad ban ai jingkyrshan ïa ki samla pule. Ka jinghiar jong ka NEHU ka la long na uwei u snem sha uwei pat. Kiba bun ki kam nonghikai bad nongtrei ki sah pongding. Ki samla pule ki pynpaw ïa ki jingduna kiba bun.”
“Ngi ai ka jingkyrshan ïa ka jingïakhih shi spah na ka shi spah haduh ba kin da ïoh ïa u soh uba thiang,” u la ong.
“Ngi wan ban ai jingkyrshan namarba ngi don ka jingsngewkhia ïa ka lawei ka ki samla pule jong ka jylla bad ka thaiñ Shatei Lammihngi baroh kawei. Ngi pynrem jur ruh ïa ka jingleh kuman jong u VC ha wat haba la poi kat haduh une u pud ruh um shym la leh eiei,”u la ong bad bynrap.
“Ka MITCRM ka la rai ban thoh da ka shithi sha ka President ka ri India kaba dei ka Visitor jong kane ka skulbah ba ka dei ban tuklar mardor ïa kane ka mat bad ban pynkut noh ïa ki kynrum kynram hapoh ka skulbah,” la ong shuh shuh u Bah Blah.
“Ka rai kaba ka MITCRM ka la shim ka long ban pynbna ïa u Vice Chancellor jong ka skulbah NEHU kum u briew ba la kyntait,” la ïathuh u Bah Blah bad bynrap, “kaba mut ngi la kyntait ïa u, ngim ithuh shuh ïa u bad ngim kwah shuh hi ruh ba un dang don ha kane ka jylla jong ngi bad kane kan dei ruh ka khubor sha baroh kawei ka ri India ba ngim kwah ba uno uno u briew uba wan hapoh kane ka skulbah NEHU nangne shakhmat ki bym don ïa ka jingñiew burom ïa ka kolshor, ïa ka riti ka dustur jong ngi ki ritpaid ha ka thaiñ Lammihng ka ri India.”
U Bah Erwin K Sutnga haba bynrap halor kane u la ong, “ka don mynta ka jingpynkylla ïa ka rukom ai jinghikai kaba pynrung ïa ka niam Hindu kaba long ka jinghikai kaba shyrkhei bha bad ka dei ka jingeh kaba ngi ïakynduh mynta.”
Haba phah ïa u kyrwoh sha u Prof Shukla, u Bah Sutnga u la ong, “phi la pynlong ïa ngi ban leh ïa kaba ngim pat ju leh mynno mynno ha ka histori jong ka jaidbynriew. Ngi long kiba kloi ban pdiang sngewbha ïa kino kino ki stad kot hynrei phi la pynlong ïa ngi ban pynbna ïa phi kum u briew ba la kyntait nangne shakhmat na ka bynta ka hok jong ki samla, ki nonghikai bad ki nongtrei jong kane ka skulbah.”
“Ngi kyntu ruh ïa ki paidbah ban ai jingkyrshan ïa kine ki samla namarba ka por ka ladei ban pyni ïa ka Sorkar India ba kam dei ban pynlong ïa kane ka jaka (NEHU) ka tin theh ñiut bad namar kata ka daw ngi hap ban ïa tylli kum ka jaidbynriew, da kaba klet noh ïa ka politik, klet noh ïa ka jingïadait, ka jingïapher jingmut bad ngin wan tylli hangne,” la kyntu u Bah Sutnga.
Ha kane ka janmiet, ka Chairperson jong ka Meghalaya State Commission for Women (MSCW) ka Kong Ïamonlang Syiem ryngkat ka jingsynran lang jong ki dkhot ka Commission ki la hiar sha skulbah NEHU ban leit ai mynsiem ïa ki samla pule bad ong ruh ba ka jingleit jngoh ïa ki samla pule ka long halor ka jingsngew parabriew hadien ba ka la ïohi ïa ka jingshah shitom jong ki kat haduh ba ka la ktah wat ïa ka koit ka khiah ka jong ki.
