Shillong, Naitung 24: Ban pynkhreh ïa ka samoi ïalehkai ban wan, ka Meghalaya Cricket Association [MCA] hynne ka sngi Palei (24 tarik Naitung, 2025) ka la pynbna ba ka la jied ïa ki 32 ngut ki nongïalehkai ba la kham rangbah na ka bynta ka samoi ïalehkai kriket 2025-26 jong ka BCCI.
Ka Senior Men’s Selection Committee ka la pynmih ïa kane ka thup kynhun hadien ba ka la bishar bñiah ïa ka jinglah jong ki rangïalehkai ban ïalehbha ha ka selection trial ba dang shen bad kumjuh ruh da kaba bishar ïa ka rukom lehkai jong ki ha ka samoi 2024-25 bad 2023-24.
Nalor ki rangïalehkai trai ri yn pyndap ïa ka kynhun Meghalaya da ki lai ngut ki nongïalehkai kiba nabar (guest professional player). Ki nongjied ki la kynthup ruh ïa u Bipin Kumar Ray ha ka thup jong ka standby lada jia ba u Adarsh Joshi um ïoh jingbit na ka BCCI halor ka bowling jong u.
Ka MCA kan pynlong ïa ki jingïalehkai pynkhreh ba khatduh ban jied ïa ka kynhun ba pura ha ka taïew ba nyngkong jong u bnai Nailar bad la ai jingmut ïa kine ki nongïalehkai kiba la paw kyrteng ha ka thup ba kin minot ban ïaid shakhmat ïa ka jinghikai bad jingkilanmet jong ki, ong ka kyrwoh ba la pyllait da u Honorary Secretary ka MCA, u Rayonald Kharkamni.
Na ka bynta ka kynhun ïalehkai jong ki shynrang kiba la rangbah, ka samoi ïalehkai kan sdang da ka Ranji Trophy naduh ka 15 tarik u Risaw bad bud sa ka T20 Syed Mushtaq Ali Trophy naduh ka 26 tarik Naiwieng bad ka lympung ïalehkai One Day Vijay Hazare Trophy naduh 24 tarik Nohprah.
Ki rangïalehkai kiba la shah jied ha kane ka kynhun pynkhreh ki long: Anish Charak, Bijon Dey, Adarsh Joshi (standby Bipin Kumar Ray), Agreas Chamcham A Sangma, Arpit Bhatewara, Bibek Poudel, Kishan Lyngdoh, Swarajeet Das, Akash K Chaudhary, Himan C Phukan, Swastic Chettri, Yogesh Tiwari, Jaskirat Singh Sachdeva, Chengkam Sangma, Ram Gurung, Arien B Sangma, Mewada Shylla, Arbin Singh, Badonnam John Mylliemngap, Kush Agarwal, Abhishek Gupta, Aaron AR Nongrum, Rohit Shah, Abhishek Kumar, Aryan Borah, Tarique A Siddique, Bamanbha Shangpliang, Riboklang Hynniewta, Dippu Sangma, Lerry G Sangma, Rahul Shah, Sengsrang K Sangma
