Shillong, nailar 27: Ka Meghalaya Cricket Association lyngba ka Junior Men’s Selection Committee, ka la ïoh ban jied ïa ka kynhun ki khynnah samla shynrang kiba hapoh 19 snem (U-19) kaba don 30 ngut ki nongïalehkai kiba lah ban mihkhmat ïa ka jylla ban ïashim bynta ha ki lympung ïalehkai jong ka BCCI jong ka samoi 2025-26.
Kane ka samoi ïalehkai kan sdang ha ka 09 tarik Risaw da ka Vinoo Mankad Trophy kaba dei ka lympung ïalehkai kriket One Day, bud sa ka Cooch Behar Trophy ka ban hap ïalehkai bun sngi naduh ka 16 tarik u Naiwieng.
Ka kynhun ki nongjied jong ka MCA ki la pynshong nongrim ïa kane ka thup kyrteng hadien ba ki la bishar bñiah ïa ka rukom ïalehkai jong ki nongïalehkai ha ka selection trial ba la pynlong dang shen bad kumjuh ruh da kaba bishar ïa ki jingkheiñ ba ki la kamai ha ka samoi ïalehkai 2024-25 bad 2023-24 jong ka BCCI.
Ha kane ka thup ki don arngut ki nongïalehkai kiba la shah pynrung shipor ha ka thup jong ka MCA – ba kynthup ïa u Jarrett M Wanniang bad u Manthan Gupta. Ka jingdon jong ki ha ka thup ba la jied ka shong ha ka jingpynbna na ka BCCI ha kaba ïadei bad ki kam ba ki la leh ban pynbeit ïa ka rukom bowling jong ki.
Ka bynta kaba ar jong ki jingïalehkai ban jied ïa ka kynhun kan long ha ka 08-13 tarik Nailur ha Jagiroad, Assam, ka ban bud sa ka jingïalehkai pynkhreh shuwa ban sdang ka samoi ïalehkai jong ka BCCI.
Ki kyrteng jong ki rangïalehkai kiba la shah jied ha ka thup ba shipor: Angkit Tamang, Rudra Singh Rathore, Jarrett M Wanniang, Yash Harlarka, Paisal Ali, Mewankitbok Kharpuri, Gaurav Jyoti Thakuria, Rohit Sharma, Grish Raj Ray, Apandanka R Marak, Gaurav Narleng, Dipayan Nandi, Namewanki Pakyntein, Sameer Choudhary, Bishesh Chettry, Damechwa Khongsngi, Jamesbirth Sangma, Aristo Marak, Ashish Kumar Lohar, Mannan Surana, Namgrik K Sangma, Aryan Kumar Rai, Heiyoomiki Ryngkhlem, Krishwal Marak, Abagtha Marak, Manthan Gupta, Benedict Jones Makdoh, Benhaden M Marak, Rimtora D Shira, Jeristo R Marak
