NEW DELHI, ïaïong 07: Ka All India Football Federation (AIFF) ha ka sngi Nyngkong ka la pynbna ïa ka prokram ïalehkai na bynta ka Kalinga Super Cup 2025 ha kaba ka Kerala Blasters kan aireng pyrshah ïa ka East Bengal FC ha ka jingïalehkai ba nyngkong ha ka 20 tarik ïaïong.
Kane ka lympung ïalehkai, kaba yn sa pynlong ha Bhubaneswar, Odisha, naduh ka 20 tarik ïaïong haduh 03 tarik u Jymmang, kan sakhi ïa ka jingïashim bynta jong 16 tylli ki klob (13 tylli na ka Indian Super League bad lai tylli kiba na ka lympung I-League), ha ka rukom ïalehkai knock-out, kaba mut ba man kawei pa kawei ka jingïakhun ka long kaba kongsan, namar tang shu rem shi sien ki kynhun kin duh ban jam shakhmat. Baroh ki jingïalehkai kin long ha Kalinga Stadium.
La pynïakap ïa ki jingïalehkai na bynta ki kynhun ISL katkum ka kyrdan ba ki bat ka ha ka samoi ïalehkai 2024-25. Lai tylli ki kynhun ïalehkai I-League ki la pynthikna ba kin ïashim bynta – kiba kynthup ïa ka Churchill Brothers FC Goa, ka Inter Kashi, bad ka Gokulam Kerala FC. Kine ki kynhun I-League kin ïakynduh pyrshah ïa ki lai tylli ki klob ISL kiba kynsai tam (ba kynthup ïa ka Mohun Bagan Super Giant, FC Goa bad ka Bengaluru FC). ïa kine ki lai tylli ki jingïalehkai yn sa rai da kaba pynïakap lyngba ka khalai nusip ha ka sngi Balang.
Ka Round of 16 kan sdang naduh ka 20, 21, 23 bad 24 tarik ïaïong, ka Quarter-final ha ka 26 bad 27 tarik ïaïong, ka semi-final la buh ha ka 30 tarik ïaïong, bad yn pynkut ïa ka final ha ka 03 tarik Jymmang.
Yn nym don extra time lada ka jingïoh thep kol ka ïakhaid haduh kaba kut jong ka 90 minit ha ka Round 16, quarter-final bad semi-final, bad yn rai ïa ka nongjop da ka tiebreaker (penalty shoot-out). Lada ka kol ka ïakhaid haduh kaba kut jong ka 90 minit ha ka final, kan don ka extra time, bud sa ka penalty shoot-out ban rai ïa ka lahduh.
Ka lahduh jong ka Kalinga Super Cup 2025 kan ïoh jaka haka Preliminary Round na bynta ka 2025-26 AFC Champions League Two.
Ka East Bengal FC ka dei ka lahduh ba bat ïa ka burom, hadien ba ka la pynliem ïa ka Odisha FC ha ka final jong u snem 2024 ha Bhubaneswar. Ka Odisha FC (2023), FC Goa (2019) bad ka Bengaluru FC (2018) ki dei ki lahduh barim jong ka Super Cup.
Ka prokram ïalehkai jong ka Kalinga Super Cup:
Round of 16 (ki kyrdan hapoh braket):
20 tarik ïaïong — Kerala Blasters FC (8) vs East Bengal FC (9)
20 tarik ïaïong — Mohun Bagan SG (1) vs I-League Club – TBC
21 tarik ïaïong — FC Goa (2) vs I-League Club – TBC
21 tarik ïaïong — Odisha FC (7) vs Punjab FC (10)
23 tarik ïaïong — Bengaluru FC (3) vs I-League Club – TBC
23 tarik ïaïong — Mumbai City FC (6) vs Chennaiyin FC (11)
24 tarik ïaïong — NorthEast United FC (4) vs Mohammedan Sporting Club (13)
24 tarik ïaïong — Jamshedpur FC (5) vs Hyderabad FC (12)
