Pynbit pynbiang bad pynitynnad ka SACH ïaka Umdiker LP & UP School

Nongpoh, Nailur 14: Ban nang pynïoh ïaka jaka pule kaba ibit ibiang bad ka ban pynkhring ruh ïaki khynnah skul ba kin wan tista sha ka skul, mynta ka sngi naka liang ka Society for Action in Community Health (SACH) ka la ïoh ban aiti noh ïaka skul Umdiker LP & UP School sha ki bor pynïaid skul hadien ba ka la dep ban pyniphuh iphing bad pynkylla dur lut nadong shadong.
Ha kane k jingïalang la ïadon lang da u Jayanta Mundoi Branch Manager HDFC Bank Nongpoh, Branch, U Venugopal. Mk u nongïalam ba ha khmat jong ka SACH, u bah Barristerfield Lyngdoh, Headmaster Umdiker LP & UP School, Bah S. Sohktung Rangbah Shnong Umdiker, bah Lumlang Nongsiej BMC Umsning Block, ki nonghikai jong ka Sohpdok LP School bad Toh Umsiang LP school lem bad ki khynnah skul.
Ïa katei ka skul naka liang Ka Society for Action in Community Health lane ka SACH lyngba ka jingïarap ban bei tyngka naka HDFC Bank hadien ba ki la dep ban pynlut pynsep ban pynjanai ïa katei ka skul naduh ka jingai rong, ban pynbit pynbiang ïaki Ben shong, ka kamra kynshew kot, ki bor ding electricity, ki pangkha ban pyn pyngngad ïaki khynnah skul ha ki por shit bad kiwei kiwei de ki jingdon kam jong kane ka skul, naka liang ki nongtrei jong ka SACH ha ryngkat ka jingïadon lang ki nongtrei jong ka HDFC Bank lem bad ki nonghikai ki la pynlong daka program kaba kyrpang ban ïoh ban ot ïa u ribon bad ban aiti noh sha ki bor pynïaid skul.
Khyndiat halor jong kane ka SACH, ka Society for Action in Community Health (SACH) kadei ka kynhun kaba ïaleh ban wan rah ïaki jingmyntoi bapher bapher sha ki shnong nongkyndong naduh ka pule puthi, ka roi ka par, ka koit ka khiah, ki kam ri jingri bad kiwei kiwei bad ban pyntyllun ïaki kam jong kane ka kynhun la bei tyngka kyrpang daka HDFC Bank. Kane ka SACH ka don ka jingthmu ban wan rah ïaki jingmyntoi ïaki shnong bapher bapher kiba hapoh jong ka them Ri-bhoi District bad ïa mynta ka la jied ïaki 15 tylli ki shnong jong ka Umsning Block bad ka Shnong Umdiker kadei kawei napdeng jong kine ki 15 tylli ki shnong kaba la shah jied ban ioh jingmyntoi.
Haba kren ha katei ka sngi, u bah Lumlang Nongsiej BMC Umsning Block u la ai ka jingïaroh ïa ki nongtrei jong kane ka kynhun hakaba ki kam kiba ki leh ka la wan rah shisha ïaka jing iphuh iphieng ïa kane ka skul. Shuh shuh u la ong ba ka skul barabor kadei ban long kaba itynnad bad kaba khuid khnang ba ki khynnah skul kin sngewtynnad ban wan sha skul bad kyntu ruh ïaki bor pynïaid skul bad ïaki khynnah ba kin sumar bha ïa kane ka ïing skul bad ba kin leh khuid ïaka ha man la ka por.
U Jayanta Mundoi Branch Manager HDFC Bank Nongpoh, Branch, haba kren ha katei ka jingïalang kum u kongsan, u la ai khublei ïaki nongpynïaid skul ba ki la long kloi ban snohkti lang naka bynta ban wan rah ïaka jingmyntoi ïaki khynnah skul. U la kitbok ruh ïaki nonghikai ba kin dang lah ban ai ka jinghikai kaba bit ba biang naka bynta ki khynnah skul bad ba kin hikai ruh ïaki ba kumno ban long ki khynnah kiba tista ban wan sha skul bad kitbok ruh ïaki heprit ba kin nang trei shitom haki kam pule khnang ba kin long briew haka jingim jong ki.