Pynbeit thymmai ka Kynhun Myntri ïa ka MJS Rules 2006 bad MHJS Rules, 2015

Shillong, Nailar, 09: Ka Kynhun Myntri jong ka Sorkar Jylla ha ka sngi Baar ka la mynjur ia ka jingpynbeit thymmai ha ka Meghalaya Judicial Service Rules, 2006 bad ia ka Meghalaya Higher Judicial Service Rules, 2015 khnang ba ki nongthep kam ki dei ban pas beit ia ka ktien Khasi bad Garo bad ki ban long ruh kum ki Compulsory Paper.
Ha ka jingiakren bad ki lad pathai khubor, u Myntri ka Sorkar Jylla u James PK Sangma u la ong ba kane ka jingpynbeit thymmai ka la wan hadien ba ka Ingbishar Meghalaya High Court ka la shong ia ka jingialang ha ka 9 tarik Jymmang, 2022 na ka bynta ban iathir iatai ha kaba iadei bad ka jingpynbeit thymmai ia ka Schedule B jong kine ki ar tylli ki Rules.
“Ha kaba iadei bad ka Meghalaya Judicial Service Rules, Schedule B ia ka Rules ba la pynbeit thymmai yn pynrung kawei ka Compulsory Paper kata kan long ka paper IV halor ktien Khasi lane Garo bad kane ka Paper kan long kaba donkam ha kaba ka Maximum Mark yn sa buh bad lada u nongialeh eksamin u ïoh duna na ka minimum marks ba la buh yn kheiñ ba u la phiel bad ia kiwei kiwei ki Paper kiba u la thoh bha ruh yn ym kheiñ lang satia,” ong u Sangma.
“Ha kaba iadei bad ka Meghalaya Higher Judicial Service Rules, 2015, kaba ki kyndon ki long hi kumjuh yn sa pynrung ha ka Schedule B bad ban pynlong Compulsory ia ki nongialeh eksamin kiba nang ia ka ktien la ka long ka ktien Khasi, Jaiñtia lane Garo ha kaba yn pynlong Compulsory Paper ia ka ktien Khasi bad Garo na ka bynta ka Written Examination bad lada u nongiakhun eksamin u ïoh duna na ka Minimum Marks yn kheiñ ba u la phiel bad lada u thoh bha ia kiwei kiwei ki Paper ruh yn ym kheiñ lang satia,” la bynrap u Sangma.
Ha kajuh ka por une u Myntri u la ong ba ia kane rai la pdiang kum ka sienjam ba ka Jylla kan nang pynjur ia ka jingdawa ban pynrung ia ka Ktien Khasi bad Garo ha ka Khyrnit Baphra jong ka Riti Synshar ka Ri India bad kan long ruh ka lad ban pynurlong ïa ka jingandnud ki paidbah.