Shillong, Risaw, 12: U bah Titosstarwell Chyne uba long u President ka UDP East Khasi Hills bad CEM ka KHADC u la bthah ïaka Congress ban pynbeit shwa ïa la ka jongka ïing ka sem shwa ban kdew kti sha kiwei pat ki party.
“Nga kyrpad ïa ki nongïalam ka Congress ban phai khmat shwa sha ka ïing ka sem la jong bad pynbeit shwa ïa ki kynrum kynram shwa ban kdew kti ïa kiwei ki seng saiñ pyrthei” ong u bah Titos.
Une u nongïalam u la kren kumne halor ki jingkynnoh jong u nongïalam ka Congress ba ki briew ki la ngiah ia ka sorkar MDA bad kumta kin ym kyrshan ïaki kyrtong jong ki party kiba don ha kane ka sorkar ha ka election MLA 2023.
“ Ban jied ne ban ym jied ka shong ha ka mon ki paidbah, phai sha lade phi dang don MLA mynta hapoh ka ïing dorbar thawaiñ, balei ka jia hato ym dei ba mih ki huri hura hapoh ka Congress hi?” ong biang u bah Titos.
“ Nga kwah ban kylli ïa ka Congress, sa katno ngut phi don MLA mynta. Kumta sa bishar bniah bha ïa lade. Ha ka jingshisha ki dei ban ïa pynbeit shwa ïa la ka jong ka ïing ka sem namar sngewsih ban ïohi ba na ki 21 ngut ki MLA mynta kylla 0” ong u bah Titos.
