Shillong, K’ Lyngkot 20: U Myntri Rangbah ka jylla Conrad K Sangma u la pyllait paidbah ïa ka Early Child Development Framework bad ïa ka ECD content kaba dei ruh ka mat ba kongsan kaba kynthup ïa ki tiar ai jinghikai na ka bynta ki nongsumar bad ki frontline worker ka Jylla Meghalaya, kaba la pynwandur da ka Sesame Workshop ryngkat ka jingïatreilang bad ka sorkar Jylla.
Ha kaba ïadei bad kane haba kren ha kane ka jingïalang, u Myntri Rangbah haba ai khublei halor ka jingpynlait paidbah ïa ka ECD framework bad ki mat ba kongsan ka ECD u la ong, “Shibun ka jingwad bniah ka la ïaid ha kine ki shisnem shiteng ha kaba pynwandur ïa ki mat ba kongsan jong ka ECD, kiba la shna kyrpang na ka bynta ka Jylla jong ngi bad ka jingsngewthuh ïa ki jingeh ha ka thaiñ haba pyndonkam ïa ka kolshor, jingtip bad ki rukom treikam kiba la don lypa bad ba lah pynïadei bad ka jinglong ki khynnah, ki nonghikai bad ki kmie ki kpa,” u la ong.
Ha kaba ïadei bad kane u Myntri Rangbah u la pyntip ruh ba shibun ka jingkhmih bniah bad jingpyrkhat ka la leit sha ka jingthmu jong ka ECD Mission bad ka sienjam kaba kongsan ka long ka jingpyntreikam bad jingmut ba ki rukom treikam jong ki tnat treikam kiba la don lypa kin don bynta lang ban pynurlong ïa kata ka thong kaba kham heh jong ka ECD.
“Kane ka prokram ka la ïoh khring bha ym tang hapoh ka ri jong ngi hynrei wat na ka thaiñ South East Asia bad kane ka lah ban long ka lad ban wanrah ïa ka jingkylla kaba khraw, ka jinghikai bad ka nuksa na ka bynta kiwei pat ban bud,” u la bynrap.
Ha kaba ïadei bad kane u la ong ruh ba katba ka bor sngewthuh bad jingithuh ka dang sdang ban nang khlaiñ jong ki Khunlung, ka pot ka long ruh kaba kongsan ban pynrung ha ka jingsngewthuh jong ki ïa ka jinglehkhuid, ka jingburom ïa ka mariang, ka mynsiem ieid ri bad ban long u nongshong shnong ba don ka jingkitkhlieh.
Ha kane ka sngi la don lang ki ophisar na ka tnad Social Welfare, ka sorkar Meghalaya bad na ka Sesame Workshop.
