Pyllait u Modi ïa ka ‘PM Vishwakarma’ scheme ha Delhi
![](https://mawphor.com/wp-content/uploads/2023/09/PM-Vishwakarma-Kaushal-Samman-Yojana.jpg)
Shillong, Nailur 17: Ka scheme ba thymmai na ka bynta ki nongshna jingshna da ki kti bad ki nongthaiñ jingthaiñ ka PM Vishwakarma, la pyllait paidbah mynta ka Sngi u Blei da u Myntri Rangbah duh ka ri u Narendra Modi haka jingrakhe ïa ka Vishwakarma Jayanti ne ka Vishwakarma puja.
Ha shwa ban pyllait paidbah ïa ka jingtreikam kane ka scheme u Myntri Rangbah duh ka ri ula leh burom da kaba leit buh syntiew ïa u blei Vishwakarma haka India International Convention and Expo Centre ha Dwarka.
Ka Cabinet Committee on Economic Affairs dang shen kala bhah T. 13,000 Klur ïa katei ka scheme yn ïoh da ki nongshna jingshna da ki kti bad ki nongthaiñ jingthaiñ tynrai naduh ka mang tyngka jong u snem 2023–24 haduh ka 2027–28.
Hapoh kane ka scheme, ki Vishwakarma yn rejistar ei lyngba ka Common Services Centres (CSC) da kaba pyndonkam ïa ka PM Vishwakarma Portal, ha kaba yn ai jingithuh ïa ki da kaba ai ïa ka PM Vishwakarma certificate bad Identity card, ka jingai jinghikai ban pyntbit shuh shuh ïa ka sap ka phong, ka jingai jingïarap ban thied ïa ki tiar ki tar kaba kot T.15,000, ka jingai jingkyrshan da ka pisa T.1 lak ha ka wat kaba nyngkong bad ka T.2 lak ha ka wat ka baar ha kaba kan don ruh ka jingpynduna ïa ka ram da 55% bad kumta ter ter.
Kane ka scheme kan ai jingkyrshan ïa ki nongshna jingshna da ki kti bad ki nongthaiñ jingthaiñ tynrai kiba don ha sor bad ha nongkyndong.
Ki don 18 tylli ki jait jingtrei kiba la ithuh lyngba katei ka scheme kaba kynthup ïa ka kam misteri, nongshna lieng, nongshna ïa ki jingdeng ïada, nongsaiñ nar, nongshna ksiar, nongshna tala shabi, nongshna ïa u tyrnem bad kiwei kiwei, nongshan khiew dewbyrta, nongoh shrong dur, nongsaiñ maw, nongsuh juti, nongthaiñ synsar, shang, nongshna khun bynriew bad ki jingïalehkai, nongkhap shniuh, nongsaitjaiñ bad nongshna jar tong dohkha.
U Myntri khynnah ka sorkar pdeng uba khmih iaka Jal Shakti, Food Processing & Industries u Prahlad Singh Patel ula plie pyrda ïa ka ‘PM Vishwakarma’ scheme ha nongbah Shillong. U Prahlad Singh Patel ula leit ruh ban ïakynduh ïa u Myntri Rnagbah ka jylla u Conrad Sangma ha ka ïingsah ka jongu ha Shillong.