Shillong, Naitung 02: Kum ka kam kaba kongsan ban kyntiew ïa ka koit ka khiah bad ki jingshakri jong ka ha ka thaiñ, u Lat ka jylla Meghalaya, u Phagu Chauhan, u la nohsynniang bad pyllait ruh ïa ka ambulance sha ka Seva Bharati Meghalaya ha ka prokram aiti kaba la pynlong ha Raj Bhavan ha ka sngi baar. Kane ka jingnoh synniang ka long ka dak kaba bha na ka bynta ka seng, kaba la pynpaw ïa ka jingkhublei ïa kane ka jingnohsynniang.
Kane ka jingaiti ïa katei ka kali sumar la don bynta lang u Principal Secretary sha u Lat, u Harish Chandra Chaudhary, ha ryngkat bad ki ophisar bad ki nongtrei jong ka Raj Bhavan, Shillong, bad ki dkhot ka SevaBharati Meghalaya.
Ka SevaBharati Meghalaya kadei ka social service organization ba la pynrung kyrteng hapoh ka Meghalaya Societies Registration Act ha 1995. Ha kine ki 18 snem ba la leit, ka la pynïar ïa ki jingshakri sha baroh ki district ka Meghalaya, kaba la buh ïa ka thong halor ka koit ka khiah, ka pule, ka jingai jinghikai halor ka sengkam, bad kiwei kiwei.
