Pyllait paidbah u DC ïa ka Immunization App ha EJHD kaba dei ka injek jong ki khyllung

Khliehriat Naiwieng 11: U Deputy Commissioner ka East Jaiñtia Hills District, u Abhilash Banarwal, IAS hynnin ka sngi ha ka jingïalang ba la pynlong ha Conference Hall ha Khliehriat, u la pyllait paidbah ïa ka Immunization App kaba dei ka injek kaba na ka bynta ki khyllung bad la khmih lynti ruh ba baroh ki khyllung kiba la kha naduh u bnai risaw 2022 ki dei ban ioh lut ïa ki injek ha kaba ki nongtrei ka tnat ka koit ka khiah kin sngewbha ban buddien lyngba kane ka App.
U Deputy Commissioner, u la pynshai shuh shuh ruh ba lyngba kane ka app yn sa lah ban ïoh ïa ki jingtip kiba bniah ha kaba ïadei bad ka jingioh injek ki khyllung wat kito kiba don sha ki jaka ki kyndong ruh ruh kum sha ki jaka khappud bad ki shnong ba don ha ka thaiñ Saipung.
La ong ruh ba ki ASHA ki dei ban peit bniah ïa kane ba ki dei ban register kloi ïa ki kyrteng jong ki khyllung lane kyrteng ki kmie ki kpa ha kaba ki ANM pat ki hap ban pyndap ïa ki data ha kane ka app bad lyngba kane ka app ki kmie ki kpa ruh kin sa ioh ïa ki jingtip lyngba ki message na ka bynta ban leh ïa ki injek na ka bynta ki khyllung .
U la ïathuh ruh ba ki bor district ki don ruh ka jingthmu ban don la ka jong ka app kaba khot ka East Jaiñtia Hills District, hynrei ïa mynta hi la plie shwa tang ïa kane ka Immunization app bad lyngba kane ka app yn sa lah ban pyndep lut ïa ki injek baroh na ka bynta baroh ki khyllung kiba naduh ki sub centre, la ong ruh ba kat haduh mynta la ïoh lum jingtip ba ki don haduh 37 ngut ki khyllung kiba khlem pat lah ban pyndep ïa ki injek bad la khmih lynti ba kine ruh kin sa pyndep.
U Deputy Commissioner, u la kyntu ruh ïa ki doctor kiba hapoh ka district ba ki dei ban shim khia ïa kane bad la khmih lynti ruh ba ha kaba ïadei bad ka jingïa injek ki khyllung ha East Jaiñtia Hills District yn sa lah ban pyn poi haduh 100 percent namar ïa mynta hi ka East Jaiñtia Hills District ka dang poi haduh 90 percent ha kaba ïadei bad ka jingai injek ki khyllung.
Ha kajuh ka por, la ong ruh ba lyngba kane ka app lah ruh ban pynpaw ïa kino kino ki jingeh bad lah ruh ban buh ïa ka jingujor lada don kano kano ka jingeh.
Kiba la ïa don ryngkat ha kane ka prokram, ki kynthup u District Medical and Health Officer East Jaiñtia Hills District, u Dr D.Shylla, u SDMHO, u Dr W.Bamon, Dr Sumer, ki ANM bad ki nongtrei ka tnat ka koit ka khiah.