Khliehriat nailur 29: Ka MLA jong ka Sutnga-Saipung Constituency kong Santa Mary Shylla ha ka jingialang ba la pynlong ha Mooshut Pyrdung Community Hall mynta ka sngi ka la pyllait paidbah ia kawei ka kali kit ñiut sha ka shnong Jalaphet Bri Sutnga kaba hap hapoh Saipung C&RC Block East Jaiñtia Hills District, kane ka kali kit ñiut ka dei kaba wan lyngba ka skim jong ka District Mineral Funding.
Haba kren ha ka jingïalang ka kong Santa Mary Shylla ka la pynshai halor ka jingdonkam ka khuid ka suba ha shnong ha thaw bad ong ba kane ka jingaiti ia kane ka kali kit ñiut kan iarap shibun eh ia ka shnong ha kaba iadei bad ka khuid ka suba., ka la bynrap ruh ba kane ka shnong Jalaphet Bri Sutnga kaba hap hapoh Saipung C&RD Block ka dei ka shnong kaba lai kaba ioh ïa kane ka kali kit ñiut bad khmihlynti ba ka shnong Jalaphet Bri Sutnga kan dei kawei na ki shnong kiba khuid tam hapoh ka district ban long ka nuksa ruh ïa kiwei ba kin bud ha kaba ïadei bad ka jingpynlang bad bret ïa ki ñiut ha ki jaka kiba dei bad bret.
Shuh shuh haba kren shaphang ka khuid ka suba ka kong Shylla ka la ong ba ka long ruh kaba donkam ban don ka jingiatreilang jong ki tnat treikam bapher bapher ba kynthup ruh ki paidbah lem bad ki nongpyniaid shnong.
U Deputy Commissioner, East Jaiñtia Hills District, u Shivansh Awasthi, IAS, u la pynpaw ka jingsngew nguh ïa ka MLA, ka kong Santa Mary Shylla kaba dei kawei na ki dkhot jong ka District Mineral Funding Committee kaba ju trei bha ïa ka kam bad kaba ju trei lang ruh na ka bynta ki project hapoh ka district ba kynthup ruh kane ka project ba sam ïa ki kali kit ñiut hapoh ka district ba kynthup ruh ha shnong Jalaphet Bri Sutnga , u la ong ruh ba ka shnong Jalaphet ka dei kawei na ki shnong kaba heh hapoh ka district ha ka jing bun briew ka dei ka jing jied kaba biang bha na ka bynta kane ka project sam kali kit ñiut kaba long ruh ka synjam ban wanrah ïa ka khuid ka suba ha shnong ha thaw.
U Deputy Commissioner u la kren ruh halor ki jingioh jingmyntoi na kane ka kali kit ñiut ha kaba ïadei bad ka khuid ka suba bad ruh ha kaba ïadei bad ka jingpyn ïakhlad ïa ki ñiut kiba pyut bad ki bym pyut namar na kane ka jingpynïakhlad lah ruh ban shna ïa ka sboh ban thung jingthung, u la pynsngew ruh sha ki paidbah ïa ka jingthmu ban shna noh ïa ka ïing ban buh ïa ki ñiut khnang ban dup lah ban buh la ka jong ïa ki ñiut kiba pyut bad ki ñiut ki bym pyut namar ïa kito ki ñiut ki bym pyut pat lah ban phah sha ki karkhana dewbilat ban shu thang noh ha ki pajwa ba rhem ding bad ong ruh ba ka jinglehkhuid ha shnong ha thaw ka pynitynnad bad wanrah ïa ka ka khuid ka suba ha shnong bad ruh ka kyntiew ïa ka koit ka khiah bad ïada ruh na ki khñiang jingpang.
Kiba la ai jingkren ki kynthup ruh u Executive Member jong ka JHADC, uba dei ruh u MDC jong ka Sutnga Narwan, u bah Seiborlang Shadap, u Waheh Shnong Jalaphet-Bri Sutnga, u bah Bevan O Dkhar bad kiwei kiwei.
Kum ban shu bynrap, na ka bynta ban kyntiew ïa ka khuid ka suba ha ki shnong ki thaw, kat haduh mynta la sam haduh hynriew tylli ki kali kit ñiut sha ki shnong bapher bapher ha East Jaiñtia Hills District kiba la ioh lyngba ka District Mineral Funding.
Kiba la ïa don ryngkat lang ha kane ka sngi ki kynthup ruh u Block Development Officer, Saipung C&RD Block, u Dr. R. Pyrtuh, ki dkhot ka Dorbar Shnong lem bad ki nongshong shnong jong ka shnong Jalaphet Bri sutnga.
