Pyllait noh ïa ka result DSC ha Ri Bhoi, ong ki sengbhalang ba shong kyllaiñ myngor ha Nongpoh

Nongpoh, Lber 04: Ki kynhun sengbhalang bapher bapher hapoh ka jinglam khmat ka Ri Bhoi People’s Council bad ka MPSO Ri Bhoi District mynta ka sngi kila sdang ïaka jingïakhih ba nyngkong jong ki da kaba shong kyllaiñ mungor hakhmat ka Indoor Stadium ha Umlyngkdait ban dawa naka sorkar ba dei ban pynlait noh mardor ïak result DSC ha Ri-Bhoi District ïa kaba la dep ban pynlong exam naduh u snem 2021-22
Ïa katei ka jingiakih jong ka seng RBPC bad MPSO da ka ba shong kyllain mungor la wan ruh ban pynshngaiñ da kiwei kiwei ki kynhun sengbhalang naduh ka CoRP, HANM, Synjuk ki Seng Samla shnong, ryngkat ki nongïalam ka Ri Bhoi Dorbar kiba la shong hakhmat katei ka Indoor stadium naduh ka por 11 baje mynstep haduh ka por 3 baje janmiet.
U Samla Jayson Lennox Nongrum President RBPC haba kren ha katei ka sngi u la ong ba kum ka seng baroh shi katta kala ïaid da ka lynti kaba jai jai lyngba ka miej jingïakren bad mynta ka sngi ruh kum ka seng kala shim da ka lynti ïakhih kaba jai jai ban shong kyllaiñ mungor, hynrei lada ka sorkar kam kheiñ snep ne kheiñ kor ïaka jingjai jai kum ka seng kala pynkhreh da kiwei ki lynti kiba kham tyngeh nangne shakhmat wat ban mih surok bad ka sorkar ka dei ban shim ïaka jingkithlieh.
Kiwei kiwei ki nongkren bala ai jingkren ha katei ka sngi naduh u Bah RR Makdoh Adviser ka Ri-Bhoi Dorbar, Bah Pateng Marsing Working President ka CoRP, Bah Aristone M Ryndongsngi President SSSS bad kiwei kiwei kila ai ka jingkyrshan ïaka seng RBPC kaba la lamkhmat ïa katei ka jingïakhih ban dawa naka sorkar ba kadei ban pynlait mardor ïaka Result DSC kaba ki khun samla kila ap khmih lynti baroh shi katta.
Ki la ong ruh ba kum ka sorkar kala dei ban shimkhia ban ai ïaka Result ym ban shu aidaw ïaka Reservation Rooster kaba ki tnad sorkar kila dep ruh ban ioh ïaki jinghikai ne ki training bapher bapher, hynrei ban shu ap sah da ki bun snem ka pynlong ïaki samla thepkam ban sah haka umdum bad ka jingnang ïaid jong ka rta thep kam.
Kumta kila kyrpad sha ka sorkar ba dei ban shimkhia ban pynlait noh ïaka result DSC ym ban ap haduh ban da mih ki jingïakhih bad ki jingïakulmar.