Shillong, Lber 07: U Myntri ka Tnad Revenue & Disaster Management Kyrmen Shylla ha ka sngi Thohdieng ula pyntip ba ka Sorkar ka la pyllait haduh T.19 lak kum ka jingïarap song pisa sha ki longïing kiba shah ktah na ki 29 tylli ki jingjia pluh ding hapdeng u snem 2024-25.
“Ka Tnad ka la pyllait ïa ka song pisa katkum ki kyndon ka SDRF,” ong u Bah Kyrmen haba jubab ïa ka jingkylli ba la wanrah da u MLA ka VPP na Mawryngkneng Bah Heaving Stone Kharpran ha ïingdorbar.
Shuwa kane, u Bah Kyrmen u pyntip ba ka Sorkar ka la ai ïa ka jingïarap song pisa ba T.1.30 lak sha ka Kong Midaris Pde jong ka Shnong Kut katkum ki kyndon ka SDRF.
“Ym shym la ai jingïarap song pisa sha ka Kong Riburom Kharrngi ba na Puriang. Hynrei, ïa ka song pisa ba T.1.30 lak la ai kum ka jingïarap sha ki trai jong ka ïing Kong Helpmer Kharrngi,” ula pyntip.
Haba jubab bynrap, u Myntri Rangbah Conrad K Sangma ula ong ba ki kyndon ka SDRF kila kren shai bha bad haba pynshong nongrim ha kane, la shim ïa ki sienjam ban ïarap haba shah kylli la ka Sorkar kan dang ai shuh shuh ïa ka song pisa.
U Conrad ula ong ba ki MLA ruh ki lah ban ai ïa ka jingïarap song pisa lyngba ka skhim SRWP lane ka Discretionary Grant.
