Pyllait ka sorkar ïa ka song pisa kaba T. 6 klur tam ban ïarap ïa ki 3 hajar tam ki nongrep

Shillong, Lber 04: Ka Myntri ba khmih ïa ka kam rep Kong Ampareen Lyngdoh ha ka sngi Ba-ar ka la pyntip ba ka Sorkar ka la pyllait ïa ka song pisa ba T.6.8 klur ban ïarap ïa palat 3005 ngut ki nongrep kiba shem jingeh na ka jingthung ïa kiwei ki jait jingthung.
Ha kaba ïadei bad kane la ong ba T. 5 klur la tyrwa hapoh ka RKVY jong u snem mang tyngka 2024-25 ban ïarap ïa ki nongrep ba shem jingeh khnang ban pynthikna ba ka kamai ka kajih jong ki kan ym shah ktah, ka la ong haba jubab ïa ka jingkylli ba la wanrah da u MLA ka TMC Rupa M Marak halor ka jingsyllad u khniang ïa ki shylluit diengkwai ha Dadenggre bad Rongram Block.
Na ka liang jong ka, ka la pyntip ba ki don 209 ngut ki nongrep ba shah ktah na ka jingbam khniang ki shylluit dieng hapoh Dadenggre C&RD Block bad 467 ngut hapoh ka Rongram Block.
Halor ka sienjam ban tehlakam ïa u khniang jingpang, ka Myntri ka la ong ba ki nongrep ki la ïoh jinghikai halor ka jingbam khniang ki shylluit bad ki lad ban tem ïa ka kynthup ka jingthang ïa ki dieng ba shah ktah, ka jingleh khuid ha ki jaka rep bad kiwei kiwei.
Ka la bynrap ba naba kane ka jingpang bam khniang ki shylluit diengkwai ka la jia ha kiwei ki jaka ruh, ka Directorate of Horticulture ka la ïatreilang bad ka Indian Council of Agricultural Research (ICAR), Krishi Vigyan Kendra (KVK), Meghalaya Bason Management Agency (MBMA) bad ka Scientist of Central Plantation Crops Research Institute (CPCRI), Kahikuchi, Assam bad Kasargod, Kerala.
“Haba pynshong nongrim ïa ki jingshem bad ki jingai jingmut jong ki stad ki jhad, ka Directorate ka la ai jingmynjur ban sam ïa ki kot lyngkdop ba don ïa ki jingbthah bad jingbatai ïa ki lad jingïada bad ki lynti ban ïakhun ïa kane ka jingpang, sha ki nongrep diengkwai” ka la ong.
Nalor kane, ka Myntri ka pyntip ba ka Sorkar ka dang ïaid shaid shaid ba ïasnohkti kti bad baroh ki Nongrep, kiba shah ktah na ka jingpang bam khniang ki shylluit diengkwai bad ka jingwad bniah ruh ka dang ïaid shakhmat ban tehlakam ïa kane ka jingeh.