Pyllait ka Meghalaya ïa ki kali PRIME Tourism ban kyntiew ïa ki kam jngohkai pyrthei

Shillong, Naitung, 02: Da ka sienjam ban bud ïa ka thong USD 10 Billion ha shwa u snem 2023, ka Sorkar Jylla hapoh ka jingïalam jong u Myntri Rangbah u Conrad K Sangma ki la jam shakhmat naka bynta ban kyntiew ïa ki kam jngohkai pyrthei kaba antad ba ka lah ban aikam haduh kumba 50,000 ngut ha ka shisnem bad nohsyniang ruh haduh 4.1% sha ka Gross State Domestic Product (GSDP) jong ka jylla.
Ïa ki kali, u Myntri Rangbah u la pyllait paidba ha ryngkat ka jingdonlang u Myntri ka Tnad Tourism ka Sorkar Jylla u Bah Paul Lyngdoh bad kumjuh ruh u Dr. Vijay Kumar D. Commissioner and Secretary ka tnad Tourism Department, ka Kong Renette C. Sohkhlet kaba long ka Secretary jong ka tnat Tourism ka Sorkar Jylla.
Kane ka sienjam ka long ban pynbiang ïa ka jingbun ka jingtuid ki nongwan jngohkai sha kane ka jylla kiba kwah ban ïoh ïa ka jingshakri kaba paka, ka leit ka wan kaba kham aram haba ki leit sha ki jaka jngohkai pyrthei. Katei ruh kadei shi bynta ban pynbiang na bynta kito ki nongwan jngohkai kiba pynkhreh ban pynlut shibun ka pisa la ka long ha ki jaka ruh bad ruh ha ka leit ka wan haba ki wan ban shangkai pyrthei ha kane ki jylla. Hynrei, hadien ba la wad bniah na ki paidbah bad ruh na ki Tourist Operators bad ka tnad Tourism la lap ba nalor ka jingdon ki kali ban leit ki nongjngohkai ka Meghalaya ka duna bha ka jingdon ki kali kiba biang na bynta kito ki nongjngohkai pyrthei kiba kham bit kham biang nalor ki nongniah kiba donburom na ka bynta ban kyntiew shuh shuh ïa ki kam jngohkai pyrthei ha ka jylla.
Dei na kane ka daw ba ka sorkar jylla ka la pyllait paidbah da ki kali kit nongjngohkai pyrthei kiba paka na bynta ki nongseng kam lajong kiba ïadei bad katei ka bynta.
U Myntri Rangbah haba kren ha ka jingïalang u la pynpaw ïa ka jingkmen kaba khraw bad ong, “Ngi dap da ka jingkmen ban ïoh pyllait paidbah ïa ki PRIME Tourism vehicles scheme, kaba dei ka sienjam shakhmat ban kyntiew ïa ka kam jngohkai pyrthei. Da kaba pynbiang ïa ki kali pura ryngkat ki nongniah kiba donburom bad ba la tbit bad buh hakhmat eh ïa ka jingshngaiñ jong ki nongshong, ngin ai ka jingshakri kaba paka kaba ki nongwanjngoh kai kin sah kynmaw ïa ka jingwan jong ki. Kane ka sienjam ym tang ba kan kyntiew ïa ka ïoh ka kot jong ka jylla hynrei kan pynkup burom shuh shuh ïa ki nongseng kam lajong bad ruh ïa ki nongniah kali kiba la tbit kumta kane kan kyntiew lut ha baroh ki liang.”
U Bah Paul Lyngdoh haba bynrap halor kane u la ong, “haba ngi pyllait paidbah ïa kine ki kali, ngi sdang ruh ïa ka lynti ka jingkyla ban pynlong ïa ka Meghalaya kum ka jylla kaba paka tam eh na bynta ki nongwan jngohkai pyrthei. Lyngba kine ki kali kiba kham biang, ym tang ba ngi ai kamai hynrei ngi plie lad plie lynti ruh na bynta ka kam kamai na ka jingitynnad ka mei mariang bad ruh ki paidbah Meghalaya.”
Lyngba kane ka skhim, ka Sorkar Jylla ka kyrshan pisa haduh mar shiteng ka dor kali ha ka jingmang pisa kaba 6 klur tyngka. Kane ka jingkyrshan pisa ka kynthup haduh 90 persen ka jingsiew ba nyngkong ka dor kali (down payment) kaba pyntikna ba ki nongïoh jingmyntoi kin ïoh ïa katei ka kali kaba la paka da kaba siew shwa tang 1lak tyngka ka bai seng ne down payment. Nalorkata la siew tam ruh 20 persen ka jingsiew kaba man u bnai ban pynsuk ïa ka jingtreikam. Kane ka skim ka thmu ruh ban pynbiang shuh shuh ïa ka jingdonkam ki nongwan jngohkai kiba kham bit kham biang la ka long naduh ki kali, ki nongniah kiba tbit, ki nongïalam kai, ban suk wai kali ha ka dor sorkar bad ruh ban thaw pat ïa ki lad kamai.
Kum ka jingsdang kaba ïaid tang shi bnai katei ka skim ka la ïoh pdiang ïa ka jingtyrwa kaba haduh 600 ngut kiba kwah ban pyntreikam ïa katei ka prokam jong ka sorkar. Hynrei ha kaba sdang la jied shwa tang 47 ngut lyngba ka jingbishar kaba bniah da kaba peit shwa ïa ka jingtbit jong ki halor ka kam jngohkai bad tip ïa ka lynti badka leit ka wan kaba shngaiñ kaba kum ki nongniah ki donkam ban tip. Na ka liang ka tnad ka pynlong ruh ka jingai jinghikai na bynta jong ki khnang ba kin sngewthuh kumno ban buh shwa hakhmat ïa ka jingshngaiñ jong ki nongshong. Nalorkata, ka sorkar kala pyndait ruh da ki GPS ha kitei baroh ki kali ban suk ban buddien ïa ki lada jia ba don kano kano ka jingjia ba kyrkieh.
Nalorkine, ka PRIME Tourism Vehicle Scheme, jong ka tnad Tourism ka sorkar jylla ka la sam ruh ïa ki life jackets, first aid box bad ruh ki jingïalehkai sha ki nongpynïaid ïa ki jaka jngohkai pyrthei kiba don ïa ki jingïalehkai ha um. Ka la don ruh ka jinghikai da kaba treilang bad ka Tour Operators na ka bynta ki nongking lieng bad ruh ki jinghikai ban pyllait im bad ruh ka CPR na ka bynta kito kiba wan na ki jaka jngohkai kum na Shnongpdeng, Sohra, Darrang, Dawki, Umsyiem, bad kiwei.