Pyllait ka Food Safety, test sa ka tnad Fisheries ïa ki dohkha

Shillong, Jylliew 27: Ka Commssioner of Food Safety, ka Kong RM Kurbah, ka la pynbna paidbah ba ïa ka jingkhang wanrah dohkha na Andhra Pradesh, la weng noh naduh ka 24 tarik mynta u bnai.
Hynrei mynta ka sngi, ka tnad Fisheries na Shillong ka la wan ban test biang ïa ki dohkha ha ïewduh. Kane ka jingleit test biang da ki ophisar bad nongtrei kane ka tnad ka la pynlong ïa ki mahajon die dohkha ha ïewduh ban nym ban sei ne die ïa ki dohkha, katba kim pat ïoh ïa ka hukum kaba shai na ki bor sorkar.
“Ngi, ngi shu wan ban leh ïa ka test, ngim donbor ban ong ban die ne ban nym pat die”, la ong ka ophisar ba wan ïalam ïa ki nongtrei ban leh ïa ka test ha ïewduh.
Na ka liang ki nongkhaïi, ki la ong ba kan long kaba eh ïa ki ba kin sei ïa ki dohkha ba la wan kit na shabar jylla ban die sha kiwei kiwei de ki nongkhaïi kiba don ha ka jylla, namar ba lada lap ba ka dohkha ka dang don ka formalin lyngba kane ka jingwan test ka tnad Fisheries kan long ka jingleh beiñ ïa ki nongdie dohkha ha kylleng kylleng ki jaka.
Ym lah ban tip na kaei ka daw ba ka tnad Fisheries ka wan ban leh biang ïa kane ka test, haba ka tnad Food Safety ka la pyllait noh ïa ka jingkhang ban wanrah ïa ki dohkha na shabar. Hynrei u Myntri Rangbah ka jylla, u Conrad Sangma, u la ong hynnin ka sngi ba ka sorkar kan peit shuwa ïa ka koit ka khiah jong ki paidbah bad ong ruh ba kane ka dei ka bynta kaba kongsan eh jong ka sorkar.
I Dr. Ampareen Lyngdoh, Myntri ka tnad ka koit ka khiah jong ka jylla, mynta ka sngi pat, i la ong ba ka sorkar lada ka lap ba kine ki dohkha kidei kiba dang don formalin hadien ba ladep test, ka sorkar kan hap ban khang biang, namar ba ka formalin kadei ka kynja chemical ne dawai kaba pynlong ïa ki dohkha ban nym pyut katba ka ktah pat ïa ki paidbah ba kam dohkha namar ka thaw ïa ka jingpang bampong ne cancer. Ka long rub ba kiba kum kine ki jingtest kin long na ka por sha ka por.