Jowai, Ïaïong 11: Arngut ki longkmie kiba na ka shnong Darrang ki la ïoh ban pyllait im ïa kawei ka dkhoh kaba tip kyrteng ka Brown Wood Owl kaba ka jingheh ka long kum 45 centimeter.
Kine ki longkmie kiba leit thoh dieng man ka por sha khlaw sha bri, ki la lap ïa kane ka sim kaba heh ba ka lah shong ha khyndew ha khlaw bad ki la imat ka don jingpang, ki la shim ïa ka bad pyllait im ïa ka bad ban lait na ka jingpynïap na kiwei ki mrad lane ki briew.
Kumta ki la rah shapoh shnong bad ki lah pyntip mar mar sha u Secretary ka Darrang Tourism Development Society u samla Songkiman Ryngksai bad ruh sha ki nongïalam shnong ban sumar ïa kane ka sim ban lait na ka jingïap bad u ne u samla Songki u la phone sha ka tnad Wildlife West Jaiñtia Hills ban wan shimti ïa kane ka sim ba kin sumar bad ban ym duh jait namar ka dei kawei na ki sim kiba lah jan duh jait kumta na liang ka tnat Wildlife ki la hiar sha shnong Darrang ban shimti ïa kane ka sim bad ban sumar ïa ka.
Ka shnong ka la kyrpad ïa ka sorkar badei ban ai jingïarap ïa ki ar ngut ki longkmie kiba wan na ka longïing baduk badei ban ai daki kynja Scheme ïa kine ki longkmie kiba la pyllait im ïa kane ka sim ym tang ban ai ki memento lane certificate namar lada ai daka song pisa jingïarap lane kynja scheme kan nang ai mynsiem ïa ki bad ïa kiwei ban shimkhia ban nang pyllait im ïa kum kine ki jait jingthaw kiba lah jan duh jait bad kin lait na ka jingshah pynïap pathar bad bam doh haki runar ki bym don ka jingkit khlieh ïa ka mrad kiba lah jan duh jait na ka sla pyrthei.
