Mairang, Nailar 27: Ka jingkhot ïa ki paidbah ban nym thied ne die ïa ka debilat jong ka Topcem ba la pynmih da ka kompeni Meghalaya Cements Limited, mynta ka sngi ka la pur sa sha Eastern West Khasi Hills District, haba ka Seng HYC Eastern West Khasi ka la leit kylleng ki dukan die dewbilat ban kyntu ïa ki ba kim dei ban shim ban pynïaid ïew ïa ka dewbilat Topcem.
Ki nongïalam bad ki dkhot jong ka Seng ki la leit tah da ki jingthoh ha kylleng kylleng ki dukan diew bilat ha ki shnong bapher bapher jong ka Eastern West ban boycott ia ka MCL ne ka Topcem.
Kane ka jingkhot ïa ki paidbah ban kyntait ban die ne thied ïa ka dewbilat Topcem ka long hadien ba ka HITO bad ka HYC West Khasi Hills ruh ki la pyntreikam da ka “Boycot” ïa ki jingmih jong ka MCL (Topcem).
Ki nongïalam jong ka HYC Eastern West Khasi, ki la kyntu ïa baroh ki dukan die dewbilat bad wat ia kito ki bym ju die ïa ka dewbilat jong ka MCL ba kim dei satia ban shim kabu na ka jingkhang khang kane ka dewbilat ha kiwei pat ki bynta jong ka jylla, hynrei dei ban kyntait beit ban die bad ki paidbah ruh kim dei ban thied satia.
Ka daw kaba kane ka Seng na Eastern West Khasi ka shim kume, ong u President ka Seng, u Bah Joplang Kharnaïor, ka long ban pyrshah ïa ka jingshah thombor ki paid Khasi ha Thangskai ha ka 24 tarik mynta u bnai ha ka por ba don ka Public Hearing ba la pynlong da ka Meghalaya State Pollution Control Board na ka bynta ban pynheh ïa ka jingtreikam ka MCL ne ka Topcem kumba ïatip ki paidbah.
“Kum ka jaidbynriew ngi dei ban pyni ïa ka jingïatylli haba ka don ka jingshah thombor, ym dei ban ong ba kam jia shane sha ngi”, la ong u nongïalam ka HYC.
U la ong ruh ba ka jingjia ha Thangskai, ka pyni shai kdar ïa ka jingleh donbor ki Kompeni nabar jylla kiba la nud wat ban hukum ïa ki Pulit ban tied ban bom ïa ki paidbah bad wat ïa ki kynthei ki khynnah ruh tangh na ka bynta ka jingmyntoi jong ki shimet.
U la pynrem jur ruh ïa ki bor synshar kiba la shu ailad ïa kine ki Kompeni ba kin leh katba mon, katba ïa ki pat dei u paidbah uba jied ba kin long ki nongmihkhmat.
