Pulom ka jingthmu leit jurip ki komiti pynbeit pud ïa ka Langpih, sah umdum ki paidbah

Nongstoiñ, Nailur 27: Satang lai sngi thik u bnai Nailur u la kut noh, hynrei ka Regional Committee on border dispute jong ka jylla, kam pat ai jingtip ei ei ha kaba ïadei bad ka por ba kan leit jurip ïa ki jaka khappud jong ka West Khasi Hills kiba hap ha ka Langpih sector, kumba la pynsngew da u bah Paul Lyngdoh Myntri jong ka sorkar u ba dei ruh u Chairman jong katei ka komiti naduh ki bnai ba la dep.
Kum ban pynkynmaw ba u bah Paul u la ong ba ka Regional Committee jong ka jylla Meghalaya, ka la ïa pynbeit bad ka Regional Committee jong ka jylla Assam, ban pynlong ïa ka jingleit jurip ïa ki jaka kiba hap hapoh ka Langpih sector hapoh u bnai Nailur, hynrei haduh mynta kim pat pyntip satia ïa ka tarik ba kin leit.
Kane ka jingpynslem jong kitei ki komiti ban leit jurip ïa ki jaka khappud, ka pynlynga ïa ki paitbah bad ka pynartatien ruh, namar kumba ka la jia ha kine ki khyndiat taïew ba la dep, ki briew jong ka sorkar Assam ki la wan ban sorjamin ïa ki jaka ban tih surok na Dronpara haduh Sohmarang, kaba la pynlong ïa ka KSU bad ki paitbah ka thaiñ Langpih ban pyrshah ïa katei ka jingthmu jong ka sorkar Assam.
Haba pyrshang ban wad jingtip na ki nongshong shnong, kiba shong bad ki riew rangbah kiba shong ha ki shnong kiba hap ha ka Langpih sector, ki la ong ba haduh mynta ka sngi ym shym pat la ïoh jingtip satia la kitei ki Regional Committee on Border Dispute n Assam bad Meghalaya kin wan ne kin ym wan.
U bah Hindro Samakha Chairman ka Raidmynsaw, u la ong ba ka jingbym pat ai jingtip jong ka Regional Committee ka la pynlynga shibun ïa ki paitbah. Namar naduh ba u bah Paul Lyngdoh u la pynpaw lyngba ki lad pathai khubor, ba ka jingwan jurip ïa ki jaka khappud ha katei ka thaiñ kan long hapoh une u bnai. Kumta ki paitbah ki la ap khmih lynti dik dik ban ïoh jingtip, la ki jaka ba ki la khmih lynti ba kin dang hap ha West Khasi Hills kin dang sah ne kin sah khynñiat noh sha ka Assam.
U la ong ruh ba wat la ki Regional Committee kim pat ai jingtip ba kin wan ruh u don ka jingkyrmen ba ki lah ban wan pat ha ki bnai ban wan. Nalor kata u la ong ruh ba kumba ki nongsynshar shnong bad ki paitbah katei ka thaiñ ki la dep ban ïasoi ïa ki jingthoh kiba la pynpoi shaduh ka sorkar ba ki kwah ban sah beit ha Meghalaya, kata naduh ki shnong ba shong ba sah da ki paralok Garo haduh ki shnong Khasi, ka sorkar ka dei ban sngap bad ngeit ïa ka jingkwah jong ki paitbah.
Ha kajuh ka por u la kyntu ïa ki paitbah ba kin ïaishah shipor tad haduh ba kitei ki Regional Committee kin da pynbeit bha. U la kyntu ruh ïa ki paitbah ba kim dei ban sngap ne ngeit palat ïa kino kino ki jingpynshit, kiba lah ban ïalam bakla ïa ka jingsngew jong ki paitbah bad kiba lah ban pynthud ïa ka shong suk shong saiñ. Namar ka jingthmu ban wan jurip ïa ki jaka khappud ha katei ka thaiñ ha shuwa ban pynbeit ïa u pud u sam uba thikna, ka dang don ha ka lynti jong ka jingïakren hapdeng ki ar ngut ki Myntri Rangbah jong ki ar jylla.
U la ong ba la palat sawphew snem ki paitbah ki la lah ban ïaishah, kumta ha kane ka kynti lei lei haba ka jingïakren jong ki ar sorkar ka la sdang, ki paitbah ki dei ban sngewthuh ba katei ka jingthmu kan sa urlong.