Pan jaka ka Sorkar na ki shipai markhap bad ka Them ïew Mawlong ban pynkynriah ïa ki Harijan

Shillong, Nailur 27 : U Chief Secretary ka Jylla Bah D.P Wahlang mynta ka sngi Thohdieng, ula ïathuh ba ka Sorkar Jylla ka la phah shithi sha ka tnad Defence jongka sorkar pdeng na ka bynta ban pan ïa ka jaka ba mar khap bad ka Them ïew Mawlong ban pynkynriah ïa ki 342 tylli ki longïing Harijan sha katei ka jaka.
Haba ïathuh ïa kane, u la pyntip ba ïa ka shithi ruh la dep phah sha ka tnad Defence jongka sorakr pdeng kata sha u Secretary katei ka tnad bad hadien ba u Myntri Rangbah un leit sha ka nongbah Delhi un sa ïakynduh bad ïakren mar khmat bad u Myntri kam ïada ri u Rajnath Singh.
Kane kala mih hadien ka jingïakren bad ki Nongïalam ka Shiromani Gurdwara Parbhandhak Committee (SPGC) bad ka Save Shillong Sikh (SSS), kiba la wan na Amritsar, Punjab ban pynpaw ïa ka jingsngewkhia halor ka jingpynpra noh ïa ka Gurdwara kaba don ha Them Metor.
Haba ïakren bad ki nongthoh khubor, u Chief Secretary ula ong “Hooid, nga la shong jingïalang bad ki Heh ka Harijan Committee kynthup ki dkhot ka SGPC, kiba la wan naduh Amritsar. Kila pynpaw ba ka long kaba eh ïa ki ban pdiang ïa ka jingtyrwa ka Sorkar ban pynpra ïa ka Gurdwara kaba don ha Them Metor bad kyrpad ïa ka Sorkar Jylla ban wad da kawei pat ka lad ka lynti”.
U ïathuh ba hadien ka jingïakren kaba bniah bha, la shem ïa ka lynti kata da kaba kyrpad ïa ki bor shipai ban ai jaka. “Kumta, ngi la rai ban thoh sha ka Tnad shipai ba lada long kaba lah, ban ai katto katne ka jaka kaba don markhap ka Them Metor”.
“Kane kan ailad ïa kine ki nongshong shnong ban shna hi ïa la ki jong ki ïing, kan ïarap ïa ka Sorkar ban tyngkai ïa bun bah ka pisa kaba lah ban lut ha ka jingpynkynriah ïa ki sha European Ward. Lada ngi ïoh ïa ka jaka, ka Gurdwara ruh kan neh beit ha kajuh ka por bad ïa ka jaka ba sah, yn sa shimti noh da ka Sorkar ban pynroi”.
Haba kylli, u Bah Wahlang u pyntip ba ka Sorkar kala dep ban phah ïa ka shithi sha u Defence Secretary ka Sorkar Pdeng bad shen, kan sa don ruh ka jingïalang High Level hapdeng u Myntri Rangbah ka Jylla bad u Myntri ka tnad ïada ri.
“Ki Sikh kiba wan na Punjab ruh kila kular ïa ngi ba kin pyrshang katba lah ban pynkohnguh ïa ki bor shipai ba kin ai ïa ki katto katne ki jaka” ula ïathuh.
Hynrei u Chief Secretary ula pynkren shai ba watla kane ka jingïakren ka dang ïaid, ka jingpynkynriah ïa ki 342 tylli ki Longïing na Harijan Colony ka dei ka bym pat pynjlan satia.
“Kam pat don ka jingpynsangeh ïa ka jingpynkynriah” ula ong.
Ula ong ba lada ka Sorkar ka ïoh ia ka jaka na ki shipai, kine ki Longïing kin ym donkam shuh ban leit sha European Ward. “Yn shu pynkynriah ïa ki sha ka jaka ba thymmai kaba don sha shiliang ka surok bad kine ki Longïing kin sa pynlut hi ïa ki jingtei baroh. Kane ka dei ka kular bala ai da ka SGPC bad kiwei, kiba ïakhun ïa ka jingeh jong kine ki Long ïing”.