Nongpoh, Nailar 07: Da ki spah ngut ki paidbah naki shnong bapher bapher jong ka Raid Nongtung ha Ri-Bhoi District hynnin ka sngi kila hap ban leit phai biang shala ki jong ki shnong hadien ba ka jingïalang bala khot da ka Seng Samla Border Area kala pulom noh naka jingwan pynthud jong ki pulit Assam ki bym shym la ailad ïaki paidbah ban pynlong jingïalang haka shnong Jatalong jong ka thaiñ Block II.
Kum ban shu pynpaw ïa katei ka jingïalang la khot kyrpang da ka Seng Samla Border Area hapoh ka jingïalam jong u Samla Hilarius Lynshang kum u President, u Samla Aloysius Bina bad kiwei kiwei naka bynta ban ïakren halor ka jingpynbeit ïa u pud u sam kaba ka sorkar kala dei ban pynkloi noh bad kumjuh ruh halor ka jingwan pynieng ka Assam ïaki post elektrik haka shnong Jatalong bad Sabuda da ka jingthmu ban wan klun jubor ïa kitei ki shnong bad kiwei kiwei ki jingeh jong ki paidbah ba shong ba sah haka thaiñ khappud.
Kaba sngew lyngngoh ka long ba tang hadien ka jingtip ba ka don ka jingïalang ha ka shnong Jatalong ha Ri-Bhoi, ki pulit Assam ryngkat bad ki CRPF kila hiar sha katei ka jaka ban khang lad ïaki paidbah ban lum ha katei ka jaka da kaba aidaw ba kim kwah ba kan mih ka hura hura bad lada ki kwah ban lum jingïalang ki dei ban don tang kumba katto katne ngut.
Dei hadien ka jingpynthud jong ki pulit Assam kiba la hiar sha katei ka jaka naka liang ki paidbah naduh ki nongïalam shnong bad ki nongïalam ka Seng Samla kila rai ban pyndam noh ïa katei ka jingïalang bad ban khot biang hadien ka jingrakhe sngi laitluid ka ri India.
