“Pule minot, bate ïa ka por ki dei ki lad ban jop ha ki eksamin UPSC”: Anendya Raajasshre

Shillong, Nailar, 19: “Pule minot, batai ïa ka por bad pynkhreh bha ïalade ki dei ki lad ban jop ïa ki eksamin UPSC,” ong ka Assistant Commissioner bad Executive Magistrate jong ka ophis Deputy Commissioner East Khasi Hills District ka Anendya Raajsshre kaba long ruh ka Ophisar IAS haba kren kum ka Kongsan ha ka jingrakhe jong ka Shilong College Central Library bad ka Internal Quality Assurance Cell jong ka Kolej ïa ka National Librarian’s Day kaba la long ha ka 11 tarik mynta u bnai.
Ka Anendya Raajsshre ka la ïathuh ruh katto katne ki buit kumno ban pynkhreh ïa ka eksamin UPSC kaba ki samla na kylleng ka ri India ki ju ïakhun.
Ka la ïathuh ruh ba ha ka jingïaid lynti jong ka, kam shym la pynleit jingmut than tang ha kaba pule ïa ki kot hynrei ka dei ka jingpynmlien ïalade ban minot ïa ka jingpule kot, ban bate ïa ka por, ban tip ruh ki lad kumno ban pynkhreh khnang ban jop ïa kine ki eksamin.
Kane ka jingai jingkren jong ka Raajsshre ka long halor ka phang ba ka College ka la buh, “A guiding Light to Crack UPSC exams”. Mynta u snem la rakhe ruh ïa ka sngi kha kaba 131 snem jong u Dr. S.R.Rangathan.
Shwa kane, u Bah B.Syiem uba long u Vice Principal bad u Convener jong ka Library Advisory Committee, Shillong College u la ïaiban ba ka Library ka long ka bynta kaba kongsan tam ha ka jingim jong ki shlem pule bad ïathuh ruh ïa ki jingshakri jong ki Library na ka jingïaid shaphrang jong ki digital ha kane ka juk mynta.
U IQAC Coordinator u Dr.S. Sharma, u la ai jingkren ruh halor ka jingim bad ïa u synñiang u bynhei jong u Dr. S. R. Ranganathan katba ka Dr. (Mrs.) Evakorlang Kharkongor, ka la ai jingkren kumno ban tei ïa ka jingmut jingpyrkhat jong ki samla kiba dang khie dang san.
Ki samla pule kiba la ïashim bynta ha kane ka sngi, ki la ïohlad ban buh shibun ki jingkylli na ki nongai jingkren ha kaba ïadei bad ki jingpynkhreh ïa ki eksamin Civil Services bad kiwei kiwei.
Ha kane ka sngi, la ai ruh ïa ka Best Library User Awards sha ka samla Bashai Matti Lyngdoh Nongbri bad sha ka nonghikai ka Kareen M.A. Kharsohtun kiba dei na ka Department of Sociology.