Shillong, Lber 31: Ka khubor ba la ïoh na ki pulit la ïathuh ba ka Monica Lalhlimpuii ka la phah ka jingujor ba ha ka 24 tarik mynta u bnai ha ka por 1.30 nohphai sngi, uwei u runar u la prong hapoh ka ïing jong kaba ha Madanrting Block-C, Shillong bad u la tuh ïa uwei u ear pod bad kawei ka LPG cylinder. Ïa kane ka jingjia la ïoh ring dur ruh lyngba ka CCTV.
Ha kawei pat ka jingjia ki pulit ki la ïathuh ba u Bah Syrpailang Sutnga u la phah ka jingujor ba ha ka 26 tarik mynta u bnai ha ka por kumba 7 baje mynmied ki runar bym lah ban ithuh ki la tuh haduh 60 tylli ki masi napoh ka sem kaba ha ka shnong Wahrapara (EJH).
Ha kawei pat ka jingjia u Party Commander, G-Coy, 4th Bn., BSF, BOP SP-Tilla (WJH) u la phah ka jingujor ba ha ka 27 tarik mynta u bnai, ki shipai BSF ki la lap ïa artylli ki masi kiba khlem don ba kam trai najan ka BP No. 1288/MP.
