Shillong, Nailar 24 : Ka National People’s Party (NPP) ha Amlarem Constituency ka la nang ïoh bor shuh shuh da ka jingwan kyrshan u MLA barim, u Bah RL Tariang uba la ïa aireng ha ka elekshon MLA 2018 na ka Bharatiya Janata Party (BJP) ryngkat ki nongkyrshan ha ka 23 tarik u Nailar, 2022.
Ha ka jingïalang ha Amlarem, u Bah Stephenson Mukhim, MLA barim kane ka Constituency u ba pynkhreh ïalade ban ïakhun ïa ka elekshon MLA ha u snem ban wan na ka NPP, u la pdiang sngewbha ïa ka jingwan ai jingïatreilang u Bah RL Tariang lem ki nongkyrshan jong u.
Kane ka jingïatreilang hapdeng kine ki MLA barim ka long ruh ka jingthmu ban pynliem noh ïa u MLA ba mynta, Bah Lahkmen Rymbui jong ka United Democratic Party (UDP) na kane ka Constituency ha ka elekshon jied nongmihkhmat sha ka Ïing Dorbar Thawain ka Jylla Meghalaya ha u snem ban wan.
U Bah RL Tariang u la ong ba u la weng noh ïa ka jinglong dkhot jong u bad ka BJP naduh kane ka sngi hynrei um shym la ong pat ka BJP ka la khylliap lama ha kane ka Constituency.
Watla u ïaroh ïa ka jingtrei kam ka BJP ha ka Ri hi baroh kawei u la pynpaw pat ba um sngewtynnad pat ïa ka rukom treikam ka BJP ha Meghalaya.
Haba kylli balei u pynïasoh sha ka NPP ym sha ka UDP na kaba u la jop mynshwa ïa ka elekshon, u la ong, “Ka NPP dei ka Party kaba khlaiñ ha ka Jylla bad ka UDP ha ki snem ka elekshon MLA 2018 ka la leh bym ithuh shuh ïa nga hadien ba nga la rem noh ha ki elekshon”.
U Bah Stephenson Mukhim, u la ong ba u don ka jingsngew skhem ban jop biang ha ka elekshon MLA 2023 na ka NPP da ka jingwan ïatreilang lang u Bah RL Tariang, ki nongkyrshan jong u, ki riewrangbah bad ki nongshong shnong ka Constituency hi baroh kawei.
“Nga ïoh ïa ka jingkyrshan na ki MDC kiba mih khmat ïa ki Constituency kiba hap pat ha ka Amlarem MLA Constituency”, la ong u Bah Stephenson Mukhim uba la ong ba ki bun ki kam kiba dang sahteng kiba um pat lah ban pyndep hadien ba u la rem noh ha ka elekshon 2018.
