Da ka aiñ jong ka Sorkar Pdeng bujli ka Sorkar Jylla haba ïadei bad ki nongdie madan

Shillong, Nailar 24 : Ka sorkar jylla ha ka sngi Balang ka la rai ban pyndam noh ïa ka aiñ Nongdie Madan jong ka jylla ne ka Meghalaya Street Vendors (Protection of Livelihood and Regulation of Street Vending) Act, 2014 bad pyntreikam noh da ka aiñ jong ka sorkar pdeng, ba tip kum ka Street Vendors (Protection of Livelihood and Regulation of Street Vending) Act, 2014.
Haba kren bad ki lad pathai khubor hadien ka jingïalang jong ka kynhun Myntri, u Myntri ka Sorkar Jylla, James K Sangma u la ïathuh ba ka kynhun Myntri ka la ai ka jingmynjur na ka bynta ban weng noh ïa ka aiñ jong ka jylla.
U Myntri u ïathuh ruh ba ka Sorkar ka la pynlong ain ïa ka Meghalaya Street Vendors Protection of Livelihood and Regulation of Street Vending Act, 2014 hynrei ka Sorkar Pdeng ruh ka la thaw da kane kajuh hi ka aiñ ha u snem 2014 ïa kaba la tip kum ka Street Vendors Protection of Livelihood and Regulation of Street Vending Act, 2014.
La ïathuh ba ka kynhun Myntri ka la ïakren ruh halor ka jingbthah ba ki ïoh na ka Ministry of Housing and Urban Affairs bad kumta ka la shim ïa ka rai ban pyndam noh ïa ka aiñ ba la shna da ka Sorkar Jylla.
Hadien kane, u Myntri u ong ruh ba ka sorkar jylla ka la rai ban pyntreikam ïa ka Meghalaya Street Vendors (Protection of Livelihood and Regulation of Street Vending) Rules, 2022. “Kane kadei tang ka jingpdiang ïa ka aiñ jong ka sorkar pdeng bad ka kam mynta ka long ban shna sa ïa ki Rules,” u la ong.
Shuh shuh u ong ba kane kan kynthup ruh ban thaw ïa ki Provisional Town Vending Committee kynthup naduh ka jingjied ïa ki dkhot ha katei ka Committee.