Shillong, Naiwieng 18: Ka seng Hynñiewtrep Youth Council (HYC) ha ka sngi nyngkong ka la dawa ïa ka sorkar ba kan pynduh noh ïa ka jingsngewlong kongsan jong ki briew ne VIP culture ha ka jylla.
Ha ka jingthoh ba la phah na ka liang jong u President ka HYC u Bah Roykupar Synrem u la ong, “Ngi pynpaw ïa ka jingpynrem kaba jur bha halor kane VIP culture ha ka jylla Meghalaya, ha kaba kane ka la long ka bynta kaba la ktah bha ïa kiba bun balang.”
U la ong ba ka Council ka ngeit skhem ba kane ka rukom leh jong ki briew kiba la shah jied ba kynthup ruh ïa ki shipai ka long kaba ym lah satia ban pdiang.
Ha ki snem kiba la leit ruh ki la don ki jingshah kynnoh halor ka jingshah leh baheh jong kine ki briew kiba don ha ka bor ne kiba kongsan.
Na ka liang ka seng ka la pynrem jur ïa kane ka rukom leh kaba la wanrah ïa ka jingeh ïa ki paidbah ba bun.
“Na ka liang ka Council ka kyrpad ïa ka sorkar ban pynbeit noh mardor ïa kane ka VIP culture da kaba pyntreikam ïa ki aiñ ban wanrah ïa ka khuid ka suba bad kaba ïa ryngkat ïa ki nongshong shnong ka jylla. Ngi dawa ïa ki aiñ kiba khlaiñ ha kaba ïadei bad kane ka kam,” ong u Bah Synrem.
U la ong ruh ba ka Council ka la kyntu ïa baroh ki nongshong shnong ka Meghalaya ban ïasoh lang ha kaban kyntait ïa kane ka jingmut jong ka VIP.
