Tura, Risaw 24 : Kawei ka samla na ri lum Garo kaba ieit bha ïïa ka kam shet jingshet ka Nambie Jessica Marak ka la poi sha ka kyrdan ba 12 jongka MasterChef India 2023. Ka Nambie ka la sdang ban paw hadien ba ka la pyni ïa ka “ Eat Your Kappa” ha ka YouTube Channel kaba ka la ai nam ïa ka rukom bam bad kolshor jong kane ka thaiñ Shatei Lam Mihngi ka ri India. Kane ka jingpyni jongka ha ka YouTube Channel ka la khring ïa ki nongpeit ha kylleng ka ri India.
Ka jingtah Kappa ka dei ka rukom shet tynrai jong ki Garo kaba shngiam bha ban bam. Kane ka la long kum ka jngplie lynti ïa ka Nambie. Wat la ka sah sha Madras ban pyndep shuh shuh ïa ki jingpule ba kham shalor hynrei ka long kawei kaba la don ha ka thup jong kiba pyrshang ban kyntiew ïa ka jingbam tynrai na kane ka thaiñ. Namar ka jingsngew tynnad ban shet jingshet ka la jer ïa ka prokram jongka kum ka Eat Your Kappa. Ka thong jongka Nambie ka long ban pynneh pynsah, pynpaw nam ïa ki jingbam tynrai ka jylla Meghalaya.
Ka la pynpaw ruh ba ka shet jingshet ka dei kawei na ki jingthrang jongka ban pynpawnam. Ka la pynpaw ba ka sngewsarong ruh ba ka long ka riewlum ban rung ha ka MasterChef bad ka la long ruh ka jingsarong ïa ka jylla Meghalaya bad ïa ka thaiñ shatei lam mihngi hi baroh kawei.
