Shillong, Kyllalyngkot 18: Ka Dongmusa kaba la ap khmihlynti bha jong ka Meghalaya Games kaba 6 ka la wanpoi ha ka sngi Saitjaiñ-ka 18 tarik Kyllalyngkot, 2025 ha nongbah Shillong.
Ka jingwan poi jong kane ka Dongmusa ka long kum ka dak ban pyni shwa ban sdang ïa ka Meghalaya Games, kaba dei ka lympung ïalehkai kaba heh tam jong ka jylla, ka ban long shen ha nongbah Jowai, ïa kaba yn sa plie paidbah ha ka 21 tarik mynta u Kyllalyngkot kaba hap ha ka sngi Ba-ar.
ïa kane ka Dongmusa jong ka Meghalaya Games la wanrah na Tura da u Deputy Superintendent of Police (DSP) u Walsall Momin, bad u nongjop takma ksiar ha ka ïakop siat ha ka 5th Meghalaya Games, bad u Sengrak D. Marak, Chef De Mission jong ka West Garo Hills District.
Kane ka Dongmusa ka la ïaid kylleng ka nongbah Tura haduh ban da poi ha nongbah Shillong ha ka 18 tarik Kyllalyngkot. Nangne yn rah pat ïa ka da u Okitlang Syiemlieh jong ka Meghalaya Police, ha kaba yn pynïaid kylleng ka nongbah Shillong haduh ban da pynpoi ïa ka ha nongbah Jowai ha ka 20 tarik Kyllalyngkot.
Ka Meghalaya Games ban sdang naduh ka 20 tarik haduh 25 tarik Kyllalyngkot, mynta u snem kan kynthup ïa 29 tylli ki jait jingïalehkai (sports discipline). Ar tylli ki jingïalehkai—ka swimming bad ka golf—yn pynlong ha nongbah Shillong.
ïa ka Swimming yn pynlong ha Caroline Swimming Pool, katba ka Assam Rifles Golf Course ha Laitkor kan ïoh ban pynlong ïa ka jingïalehkai Golf.
Ki jingïalehkai ba dang sah ba kynthup naduh ka archery, arm wrestling, athletics, badminton, basketball, boxing, cycling, football, gymnastics, judo, karate-do, kho-kho, muay Thai, shooting, softball, sports climbing, table tennis, taekwondo, lawn tennis, volleyball, weightlifting, wrestling, wushu, ki jingïalehkai tynrai (traditional sport), roll ball, Yogasana, bad ka lawn bowling, yn sa pynlong ha ki jaka bapher bapher ba ladep bynta ha Jowai, Wahiajer, bad ha Khliehtryshi kiba hap ha ka West Jaintia Hills District.
Ka Meghalaya Games kan don haduh 3,899 ngut ki nongïashim bynta, kaba kular ïa ka jingpyni sap ba kyrpang jong ki khynnah samla ha ki jingïalehkai bapher bapher.
